Shillong, Rymphang 06 : U Kyrtong ka NPP na Mylliem bad uba dei ruh u Myntri barim ka Tnad C&RD Bah Hamletson Dohling, ula pynpaw ia ka jingsngewskhem ban shah jied biang kum u MLA ha kane ka elekshon ban long ha ka 27 tarik Rymphang bad pyntip ba bun ki nongkyrshan na kiwei ki Political party ha Mylliem, kila nang pyniasoh ban kyrshan ia u.
Ha ryngkat ka jingsynran jong ki hajar ngut ki nongkyrshan, une u kyrtong ka NPP ula thep kyrteng hynne ka sngi nyngong kum u kyrtong hakhmat u Returning Officer, ha ka Ophis u Deputy Commissioner, East Khasi Hills.
Haba iakren bad ki nongthoh khubor, u Bah Hamlet ula pynpaw ia ka jingsngewskhem ba un shah jied biang kum u dkhot ka Iingdorbar Thaw Ain ka Jylla.
Haba kular ba lada u shah jied biang, un iai buddien ia ka jingdawa ILP bad ban buddien ia kiwei kiwei ki ishu kynthup ka jingpynrung ia ka ktien Khasi bad Garo ha ka khyrnit ba phra jong ka Riti Synshar ka Ri.
“Ki paidbah ka Mylliem Constituency kila tip ia nga da ka kyrteng bad kin ai ka vote jong ki ha ka kyrteng jong nga” ong u Bah Hamlet.
U Bah Hamlet u dang shu pyniasoh shen bad ka NPP hadien ka jingiehnohkam kum u Dkhot ka PDF. U dei ruh u Myntri barim hapoh ka Sorkar MDA ba khmih ia ka Tnad Pynroi Sor bad pynroi Nongkyndong.
Haba kyntait ia ki jingkynnoh ba um ju treh ban iakynduh briew, u Bah Hamlet ula ong ba ka Iing jong u, ka plie baroh arphew saw kynta na ka bynta ki paidbah.
