Tura, Jylliew 22 : U Myntri Rangbah u la ai burom ia ki Border Security Force kiba la iakhun borbah ban iarap bad pyllait im ia ki paid khappud ha ka por ba ka jingshlei um bad ka jingtwa khyndew ka la syllad naphang ha kylleng ki bynta khappud jong ka jylla.
Ia kane u la pynpaw ha ka jingleit jngoh ia ka BSF Campus kaba don ha Dobasipara Tura bad khappud jong ka West Garo Hills bad South Garo Hills ha ryngkat ka jingdonlang u MLA Brening Sangma.
Ha kane ka jingleit jurip jong u Myntri Rangbah la donlang ruh u Alok Kumar Singh, DIG SHQ BSF nalor kiwei kiwei ki heh BSF.
Haba kren ha katei ka jingiakynduh, u Myntri Rangbah u la ong ba u sngew sarong haduh katta katta ban iohi ba ki BSF kiba la iakhun tyngeh wat hapdeng ka jingther ki bor mariang pynban ki mih beit ban iarap ia ki paidbah kiba don ha khappud ha ka por ba ka thaiñ ka mad ia ka jingshlei um.
Hadien kane, u Myntri Rangbah u la leit ruh ban jngoh ia ki jaka khappud kiba la shah pynjulor ha ka jingther jong u lapbah bad ka jingshlei um kynthup naduh ki surok ki jingkieng bad kiwei kiwei. Na ka liang jong u, u la kyntu jur ruh ia ki heh PWD bad kiwei ki heh sorkar ba kin leh ia kaba donkam khnang ba yn lah ban pynbha biang pat ia ki.
Ha kane ka sngi, u Myntri Rangbah u la aiti ruh ia ka bai luksan sha kiba haiing jong u nongniah puhshilum uba khlad ha Masighat ha kapor ba ka kali ryngkat bad utei u lanot ki la hap sha ka riat kaba jylliew bha katba ki dang iakhun ban pynkhuid ia ka jingtwa kyndew ha surok ha ka step sngi Nyngkong.
U Myntri Rangbah u la kynduh ruh ia ki kmie ki kpa jong ki lanot ba khlad na ka jingtwa khyndew ha Bolsagre, Baghmara ha kane ka sngi bad aiti ruh ia ka bai luksan kaba long mar 4lak tyngka marwei na ka bynta lai ngut ki briew kiba khlad ha katei ka jingjia.
Lah ban kdew hangne ba kawei ka longkmie ryngkat u kurim kynthup ia i khunlung ba dang saw snem ki la shah tap ha ka jingtwa khyndew na ka daw ka jingwan kynsan ka jingshlei um ha rilum Garo ha ka 17tarik mynstep.
Visited the parents who lost 3 of their loved ones in a landslide in Bolsalgre in Baghmara. Handed over ex gratia to both the parents/grandparents of the deceased. I pray for God’s strength and comfort. @PMOIndia @AmitShah pic.twitter.com/ntmdH2dfgE
— Conrad Sangma (@SangmaConrad) June 22, 2022
