Shillong, K’lyngkot 16 : U Myntri Rangbah ka Jylla Conrad K Sangma hynne ka sngi nyngkong, ula ong ba ka Sorkar Pdeng kala iai kyrshan ia ka Sorkar Jylla haduh mynta mynne.
“Nga sngewnguh ia u Myntri Rangbah Duh Narendra Modi uba la iohi jngai ban pyntyllun shakhmat ia ka Thain Shatei Lam Mihngi bad ka dei namar ka jingkyrkhu jong u, ba ngi la ioh ia baroh kine ki project ha ka thain Shatei Lam Mihngi” ong u Conrad haba iakren bad ki nongthoh khubor.
U Conrad ula kynthoh ia kane halor ka jingkynnoh jong u Myntri Khynnah ka Skill Development and Entrepreneurship bad Electronic & IT Rajeev Chandrasekhar ba ki Myntri Rangbah jong ki Jylla ki bym dei na ka BJP kila kam ei ia ka jingtrei shitom jong u Myntri Rangbah Duh ka Ri.
U Conrad ula ong, ka ri India ka don ia ka rukom synshar ba iaphiah ia ka bor (federal structure) bad ka Sorkar Pdeng ka don la ka jong ka bynta bad ka Sorkar Jylla ruh ka don la ka jong ka bynta namar ia ki kam bad ki jingkitkhlieh la iaphiah.
U ong ba hadien ba la ai ia ki project, kiba bun ki kam la shaniah ha ka Sorkar Jylla namar ki dei ma ki, kiba pyntrei ia ki.
Haba pynkynmaw ia ka jingkren nyngkong ha ka 6 tarik Lber 2018, u Myntri Rangbah ula ong “Nga la dep pynpaw ha phi ban gin pynthikna ba baroh ki jingshakri kin long kiba janai bad haba ong ia kane nga mut ba ngi lah ban nym leh ia kiei kiei kiba iapher hynrei ngin leh da ka lynti kaba pher ia kino kino ki kam bad kane ka dei ka rukom trei jong ngi ha kine ki san snem bala leit noh”.
Ula ai nuksa “Ka MGNREGS kala don ka khep ha u snem 2017 ba ngi ioh ia ka mang tyngka ba T.500-T.600 klur. Hynrei mynta ngi la pynlut jan T. 1800 klur kaba long laishai. Ka jingai injek ruh ka don hynrei tang 50% ki khynnah kila ioh ia ki injek ha u snem 2018. Mynta 95% ki Khynnah kila dep ai injek. Ha ka JJM ruh baroh ki Jylla kila ioh ia ka song pisa hynrei tang ka Meghalaya kaba la ioh arsien ia ka bonus bad ngin sa ioh ruh mynta ia ka bonus kaba lai namar ka jinglah ban pyntreikam bha”.
“Namar kata, u Myntri u lah ban don la ka jong ka jingiohi hynrei kumba nga ong kane ka dei ka ri synshar kaba iaphiah ia ka bor….ka dei ka jingiatreilang kum ka kynhun bad ngi dei ban iakyrshah iwei ia iwei. Ka jingkyrshan jong u Myntri Rangbah Duh ka dei kaba donkam bha khlem pep” ula ong haba bynrap “Hynrei kumba nga ong, ka Sorkar Jylla ruh ka don ia la ka bynta ban pynthikna ia ka jingpyntreikam ia ki skhim. Namar kata, nga ai khublei shisha ia ki Ophisar bad ka kynhun Myntrei, kiba la trei shitom ban pynthikna ba mynta ka Meghalaya ka dei kawei ka Jylla ba pyntreikam bha tam ha jan baroh ki skhim kiba wan na ka Sorkar Pdeng”.
