Shillong, K’lyngkot 16 : U National President ka NPP bad Myntri Rangbah ka Jylla Conrad K Sangma hynne ka sngi nyngkong ula ong ba ka party jong u (NPP) kan sa shim rai ban iatreilang bad kino kino ki party da kaba pynshong nongrim kat kum ka result jong ka elekshon
U Conrad ula pyntip ha ki nongthoh khubor ba ka NPP ka ieng skhem ba kan mih ban iakhun marwei ha kane ka elekshon MLA-2023 khlem kano kano ka jingiatehlok lypa ne Pre Poll Alliance.
“…ngim pat ju don ka jingiapynbeit ban iatreilang shuwa ka elekshon, kane ka dei ka nongrim ba ngi ju bud hynrei kumba ka long ba hadien ka elekshon, hooid, ngi la ju iakren bad kiwei ki party ba iasngewthuh jingmut bad kane ka dei ka kam kaba ngi hap ban khmih ynda la poi ka por” ula ong.
Haba kylli la ka NPP kan iai bteng ban iatreilang bad ka BJP, u Conrad ula ong “Ngam ong ba ngin lane ngim ym hynrei ai baka result kan mih, to ngin ap ia ka namar ka elekshon ruh kam pat long bad peit ia ka result”.
Halor ka jingkynthah narkhluid jong ka BJP bad kiwei kiwei ki party ba iatreilang ha ka MDA pyrshah ia ka NPP, u Conrad ula ong “Ngi iadonlang ha ka kynhun synrop, ngi la iatreilang hynrei katba nang jan ka elekshon, kawei pa kawei ka party kin don la ki jong ki khana ban iathuh bad kawei pa kawei kan pyrshang ban shim kabu na kano kano ka kam”.
Ula ong ba kam long satia kaba phylla ba ka BJP bad kiwei ki political party ki hap ban iakhunn bad ka NPP ha kiba bun ki constituency.
“Ka kam sain pyrthei hi ka iaid kumne bad ngin hap iakhun pyrshah ha ka elekshon…to ngin iapeit kumno ki kam ki iaid” ula bynrap.
