“Ka jingtieng kala duna ba bun ki Khynnah thymmai kila dep mih na Manipur” : Arnester
Shillong, Jymmang 07: Ki samla pule ka Meghalaya kiba don baroh shi katta ha jylla Manipur, kila pynpaw iaka jingsngewnguh iaka jingshimkhia jong ka sorkar jylla ha kaban wan shaw noh iaki na kane ka jylla kaba don hapdeng ka jingiakynad bad jingiaumsnam.
“Nga dap da ka jingsngnewnguh iaka sorkar Meghalaya kaba la shimkhia ha kaban wan shaw noh ia ngi ki samla pule kiba don ha ka jylla Manipur. Ngi la wan sha ka jylla lajong, da ka jingpynlut pynsep jong ka sorkar jylla bad wat haba ngi la poi ha Guwahatai ruh ka sorkar kala pynbiang ia ka kali ban poi haduh ha Shillong” ong ka samla M Shylla kaba pule haka jylla Manipur.
“Mynin ka 6 tarik, ngi ia don 8 ngut kiba wanphai da ka jingpynbiang jongka sorkar Meghalaya, ha kaba ki shipai kila wan ban ai jingiada ia ngi naduh ka por ba ngi mih na Hostel haduh ban da poi ha Airport” ong ka samla M Shylla.
“Ha ka por ba ka don ka jingiakynad ha ka jylla Manipur ngim shym la lei lei, hynrei ngi shu don pat iaka jingtieng namar ba ka jingjia ka lah ban sniew ha kano kano ka por bad kala don ruh ka jingmih jong ki khubor hamsaïa. Ngi shah khang beit hapoh ka Hostel bad ki don kiba pahara habar jong ka Hostel. Ngi don ka jingtieng haba ngi iohsngew iaka jingbthei ki bom bad ka jingmih ka tdem bad ngi la iohi ruh na jngai ia ka jingpluh jong kawei ka iing” la iathuh ka Samla M Shylla.
Haba iakren bad u Bah Arnestar Warjri uba pule ha RIIMS Manipur ula ong, ha ka por ba mih ka jingiakynad ula don hapdeng ka jingsheptieng hynrei mynta kane ka jingsheptieng kham duna khamtam haba ki samla pule kiba thymmai na Meghalaya kila ioh ban leit phai sha la ka jong ka jylla.
“Ngi don bha iaka jingsheptieng hynrei ngi lah shu long noh kiba jai jai namar ba ngi ki samla pule kiba la heh, ngi hap ban peit ia ki samla pule kiba hapoh jong ngi. Nga sngewlaitluid khyndiat haba bun ki samla pule kiba hapoh ia ngi, kila dep ban mih noh naka jylla Manipur bad lashai ka sngi Nyngkong, ngi don kumba 29 ngut kiban mih noh na ka jylla Manipur namar ha kine ki sngi kiba la dep ngi la phah mih shwa ia ki samla pule kiba hapoh ia ngi” ong une u Samla.
Ula iathuh ba ka jingwanphai ka jong ki lashai ka sngi da ka liengsuin kadei kaba la pynkhreh da ka sorkar jylla bad ula pynpaw iaka jingsngewnguh iaka sorkar jylla halor kane bad ka iathuh ba lashai ka sngi ynda ki mih naka jaka sah ruh kin wan shaw ki bor shipai ban ai jingiada bad jingshngain ia ki ban leit sha Airport
