Shillong, Jymmang 19: Ki nongshongshnong ka shnong Lawsohtun kila pynpaw ia ka jingsngewnguh ia u MLA barim bad Chief Adviser u Myntri Rangbah ka Jylla Bah Hamlet Dohling namar ka jingtuklar ban phah siang rong thymmai ia ki surok ha baroh kawei ka Shnong.
Ha shwa jong kane ka surok lada leit sha Lawsohtun, ki paidbah kila mad ia ka jingsyrtok ha ka leit ka wan namar ba ka surok kala jot rathai bha, hynrei ka jingmaramot ïa ki surok ha ka shnong Lawsohtun ka la ïaid shaid shaid mynta.
Katkum ka jingïathuh u Contractor, Bah E Syiem, ka jingsiang rong thymmai ïa ka surok ha katei ka thain ka la sdang la katto katne sngi mynta bad ki kyrmen ba kan yn shim por shuh ba kin lah ban pyndep lut.
U Bah Syiem u la ong “Ngi la dei ban sdang la kumba katto katne por hynrei ngi hap ban ap shwa haduh ban da dep siang lut ïa ki pipe JJM. Kumta, ngin la ïoh ban sdang siang ia ka rong ha Block 1, Block -2 ha Block -3”.
U Bah Syiem u la ong namar ba ka jingbym pat dep ban siang lut ia ki pipe u JJM, ka jingsiang surok sha kiwei pat ki Block yn sa lah ban leh kham hadien bad u la iathuh ruh ba ka thong ban pyndep ka long hapoh arbnai hynrei kata ruh ka shong pat ha ka jingailad ka bneng.
Lah ban kdew hangne ba ha ka taiew ba khatduh jong Lber, u Bah Hamlet ryngkat ki ophisar ka tnad PWD kumjuh ki nongïalam shnong ki la leit ban jurip ïa baroh shi lynter katei ka surok hadien ba ka la don ka jingud jingnam na ki paidbah khamtam na ki nongniah kali kamai halor ka jingsniew palat jong ka surok.
