Shillong, Iaiong 05: Ka seng ki samla pule Jaintia Student Union, kila pynpaw ka jingsngewnguh ba khraw ia ka sorkar Meghalaya Democratic Alliance II halor ka jingpynioh ia ka Centre ban ialeh ia ki eksamin jong ka MPSC.
Haba iakren bad ki lad pathai khubor u samla Neil Mukhim uba dei u General Secretary ka JSU seng kmie, ula pynpaw ba ki dap da ka jingkmen kaba khraw ba baroh kawei ka ri Lum Jaintia kala ioh ia ka Centre ne jaka thoh eksamin haba ki ialeh ia ki eksam kiba pynlong da ka MPSC.
“Ka jingai khublei ba kyrpang ia u Symbud Myntri Rangbah ka Jylla u Bah Sniawbhalang Dhar bad ia ka sorkar MDA II kaba la ialam da u Conrad K Sangma kiba la pynioh bhah lang ia ka centre jong ka MPSC” ong u Neil Mukhim.
Shuh shuh u Neil ula pynpaw ba kane kadei ka jingangnud ba la slem bha jong ki khun samla ka ri lum Jaintia naduh ki por ba mynshwa namar shibun ki jingeh kila ia kynduh ha ka por ba wan thoh eksam ha Shillong.
“Ka jingeh ba ki khun samla ki ju iakynduh kadei ha ka dheng kali bad kaba kham khraw kadei ha ka jinglut jingsep khamtam eh ia kito ki samla kiba wan na ki long iing kiba duna ha ka ioh ka kot” ula ong.
Ha kajuh ka por ula ai khublei ruh ia ka sorkar kaba la pynioh ia ki centre bapher bapher kum ka CUET bad kiwei kiwei ki jingdonkam jong ki khun samla.
