Shillong, Nailur 29 : U Chief Secretary ban shongthait noh Bah D.P Wahlang ula phaidien ia ka jingshakri jong u kum u Khliehduh ki Ophisar ka Jylla ba lai snem arbnai, haba pynpaw ia ka jingsngewhun kaba khraw halor ka jinglah jong u ban pyndep ia ki kam kiba u angnud ban leh na ka bynta ka Jylla.
“Nga la pyndep laisnem bad arbnai kum u Chief Secretary ka Jylla. Haba nga phai dien biang mynta, nga sngew ba nga sngewhun bha ha ka jingtreikam ha kine ki lai snem bala leit bad kat ki thong bad ki jingthmu ba nga don naduh kaba sdang ka jingtreikam, nga la lah ban pyndep ia kiba bun da ka jingsngewhun kaba pura” ong u Bah Wahlang haba iakren bad ki nongthoh khubor ha ka sngi Nyngkong haba ainam ia ka jingjop jong u sha ka jingkyrshan jong ka Kynhun ki Ophisar, ki bahaiing hasem bad ki Nongialam sain pyrthei ha ka Jylla.
Ka samoi treikam jong u Bah Wahlang kum u Chief Secretary kan kut noh ha ka sngi Ba-ar, ka 30 tarik Nailur. Yn shimti bujli na u da u Dr Shakil Ahammed, uba bat mynta kum u Additional Chief Secretary.
U Bah Wahlang ula pynpaw ba ka jinglong jingman ka suk ka sain ha Jylla kala kham jai jai ha ka por jong u kum u Chief Secretary, lait noh tang ki katto katne ki jingjia kynthup ki jingiakynad na ka jingiakajia pud bad ka Assam bad ki kam ba iadei bad ka Bangladesh.
“….Nga dei uba kham donbok ha ka jingmut ba na ka liang ka jinglong jingman ka suk ka sain ka kham jai jai. Ar-lai tylli ki jingjia kila jia. Kawei ka dei ka jingshah siat ki padbah ha khappud bad ka Assam, kaba la pynlong ia u ban pynpep noh ia ka tamasa Cherry Blossom bad ki jingkulmar/jingiakynad kiba jia shisien lano ha khappud bad ka Assam bad hadien kine, ki jingjia ka Bangladesh ka dei kawei pat kaba ngi hap ban shim sted ia ki sienjam. Lait na kita, haba phai sha ki kam kaikhlaw, ka kham jai jai bad wat ha Shillong, Jowai bad Tura ruh, ki jinglong jingman ki kham jai jai” ula ong.
Une u Chief Secretary ban shongthait noh ula kren halor ka jingkongsan ban pynbeit ryntih ia ka rukom pyniaid kam ha Secretariat bad ki Directorate, da kaba pynleit jingmut ban ai jinghikai pyntbit ia ki nongtrei bad ban nang pynjanai ia ki service rules.
U Bah Wahlang ula pynpaw ba ula shimkhia ban leh eiei halor ka jingpynbeit ryntih ia ka rukom treikam bad ban nang pynjanai ia ki service rules ha jan baroh ki Tnad ha kine ki lai snem ba u shong ha shuki.
“….ka jingpynbeit ryntih ia ki rukom treikam ha Secretariat bad ruh ha ki Directorate ka dei kawei ia kaba ngi la pynleit jingmut eh halor ka jingkyntiew ia ka rukom treikam ki nongtrei bad ruh, ngi la nang pynjanai ia ki service rules ha jan baroh ki Tnad. Baroh ki tnad ki bym don ia ki service rules, ngi la pynlong kongsan ia ki bad lada kim don ia ki service rule, ka Departmental Promotion Committee kan ym shong jingialang satia”.
Ka khubor ba u Bah Wahlang ula pashat shala ki jong ki Ophisar ka long ba kin trei da ka jingaiti lut bad ka jingieid ia ka kam, haba ithuh ia ka jingktah jong ki rai ka Sorkar ia ka jingim jong ki paid nongshongshnong.
U Bah Wahlang ula pynkhreh mynta ia ka kam thymmai bala bynshet ha u kumu Chairman jong ka Food Commission. Ula pynpaw ia ka jingaiti lut ban pynthikna ia ka jinglah pyntreikam bha ia ki prokam ba iadei bad ki marbam mardih hapoh ka Jylla.
“Ka dei ka kam kaba don jingkitkhlieh bha namar ngan hap ban khmih bad ban peit ruh ia ka jingsam marbam rashon bad hap khmih bad peit ruh ia ka jingtreikam ka Midday Meal Programme bad kumjuh ruh ka RTE nalor ki marbam ba la ai sha ki Anganwadi Centre” ula ong haba pynpaw ia ka jingkyrmen ban iatrei ryngkat ryngkat bad ka Tnad ha kaban pynthikna ba ka jingshakri kan poi sha baroh ki nongioh bynta.
