Shillong, Iaiong 23 : U Myntri ka tnad Pule Puthi Rakkam Sangma ha ka sngi Ba-ar, ula pynpaw ia ka jingsngewkhia halor ka jingbym don ki samla ka Jylla ki ban pass ia ka eksam Civil Service.
Ha u Jymmang 2023, u samla na Shillong, Swapnil Bhattacharya ula wanrah nam ia ka Jylla da kaba pass ia ka eksam Civil Service bala pynlong da ka UPSC. U Bhattacharya ula wan ha ka kyrdan ba 344 na baroh ki nongiakhun ia ka eksam hapoh ka Ri.
U Rakkam ula iathuh ba ka long kaba sngewsih ba ym shym don mano manor uh na ki samla ka Jylla ki ban pass ia kane ka eksam mynta u snem bad lehse ka lah ban don ka daw halor kane.
“Ka dei ka jingkyrsiew thiah ia ka Sorkar, ki jaka pule, ki stad kot bad ki samla ka Jylla. Ngi ngeit ba ki samla pule ka Jylla ki dei kiba stad bha hynrei kaei kaba long ba man ka dei kaba sngewkhia jur” ong u Rakkam.
U Myntri ula bynrap ba lada ka Jylla kam lah ban pynmih ia ki Ophisar Civil Service, ka lawei kan long kaba dum. “Nga kyrpad ia ki samla ba kin don ia ka mynsiem iakhun” ula ong.
Ula pynpaw ruh ia ka jingsngew ba ka daw lehse ka lah ban dei na ki curriculum bad ka jingbha jong ki jaka pule ha Jylla bad ruh ka jingmut jingpyrkhat jong ki samla, ki bym iahap kyrdan bad kiwei pat ki Jylla hapoh ka Ri.
“Ki jaka pule jong ngi kin hap ban khmih ba ki samla pule jong ngi kin ioh ia ki jinghikai kiba iakot bad ki National bad International standard khnang ba kin lah ban pynkhreh bha ialade ha ka jingiakhun ia ki eksam. Kum ka Sorkar, ngi la pyrshang katba lah da kaba ai ia ki jinghikai ia ki samla ba kwah iakhun ia ki eksam Civil Service hynrei ngam sngewthuh hangno ba ngi don ka jingduna” ong u Rakkam.
