Shillong, March 21: U Nongialam ka Liang Pyrshah Dr Mukul Sangma ula pynpaw ia ka jingsngewkhia jur halor ka jinglong jingman ka suk ka sain ha rilum Garo bad ula kyntu ia u Lat ka Jylla C.H. Vijayashankar ban bthah ha ka ban pynlong ia ka jingtohkit kaba laitluid hashwa ban pynlong ia ka elekshon jong ka Garo Hills Autonomous District Council (GHADC).
Ha ka dorkhas kaba la aiti ha Raj Bhavan ha ka 21 tarik u Lber, u Sangma ula pynpaw ia ka jingnang jur ka jingkynad ha ka thain bad ka pynpaw ka jingbym lah ban pynbeit ia ka jingdawa da ki kynhun jongka imlang sahlang ban khanglad ia ki bym dei riewlum ban iakhun ia ka elekshon GHADC ryngkat bad ka jingpynmih ia ka jingpynbna paitbah ne Official Notification ha kaba iadei bad kane ka bynta bad ka jingmih kiba kumne kumtai kiba la lam sha ka jingbym shongsuk.
Katkum ka dorkhas, la pynpaw ba ka jinglong jingman kala lam sha ka jingiaumsnam, kaba la lam ruh sha ka jingduh ia ka jingim jong ki arngut ha ka jingiakynad hapdeng ki kynhun, katba ka jinglong jingman baroh ha kylleng ki district jongka Garo Hills kila long kiba don jingma bad jingsyier.
U Sangma ula kdew ruh ia ka jingdkoh jong ki bor ba dei khmih bad pynpaw ba kane ka jingjia kala nang jur namar ka jingpulom ha kaban tuklar mardor da ki bor sorkar, kaba la ailad ia ka jinglong jingman ban nang jur. Ula maham shuh shuh ba ka lah ban don kiba khwan myntoi bad ki bor kiba nabar kiba la ai ding ia ka jingiakynad bad pynthud ia ka shongsuk shongsain ha ka thain ia kaba ym lah ban kyntait.
Haba pynpaw ba ka jinglong jingman kala sdang ban long jaijai namar ka jingtuklar jongki nongialam niam, ki nongialam shnong. U Sangma ula pynpaw ia ka jingsngewkhia ia ka rukom leh jongki pulit bad kynnoh ba ka jingkem kadei kaba shu kem katba lap ba shem bad ha ka rukom ka bym biang, khlem da pynshisha thikna. Kum kane ka rukom leh ka long ka jingiaid lait ia ka rukom ai iaka hok, kan nang pynjur ia ka jingiakhih bad pynngat da ki riewshimet kiba luilui katba ia ki nongleh kam sniew ym shim la lah ban ithuh satia.
Ula pynpaw ba dei ban iaid da ka lynti kaba dei bad u Sangma ula banjur ba ia ka jingkem dei ban leh hadien bala dep ka jingtohkit kaba bniah ryngkat bad ka jingdon ia ki sabut kiba paka, da kaba iada ruh ia ka hok jong ki nongshong shnong ka ri katkum ka ain.
Ula ai jingmut ban thung ia ka kynhun tohkit kaba laitluid ban khmih bniah ia ki jinglong jingman baroh kaba la lam sha katei ka jingiakynad, ban tohkit ia ka jingmih jong ka jingiaumsnam bad ka jingduh ia ka jingim, ban ithuh ia kito kiba donkti bad ban phah shim ia ka jingkitkhlieh lada don kano kano ka jingdkoh na ki bor kiba dei khmih.
U Sangma ula kyntu ia ka sorkar ban iadonbynta bad baroh kiba donbynta lang ha ka kam, ban wanrah biang ia ka jingioh jingshaniah na ki paitbah bad ban pynthikna ba ka jingai ia ka hok kan long kaba shai kdar ban lah ban pynneh ia ka shongsuk shongsain kaban neh shirta ha ka thain.
.){kind=link}