Shillong, Nailar 30 : U MLA ka VPP na North Shillong Bah Adelbert Nongrum ha ka sngi Thohdieng, ula pynpaw ia ka jingsngewkhia halor ka jingpyndonkam ki briew ia ki railing (jingker surok) ha Khyndailad kum ki “Jaka thad jain”.
Haba wanrah ia kane ka mat ha ka kynta kylli jingkylli hapoh ka Iingdorbar, u Bah Adelbert ula ong ba ka jingdon ki briew ba thad jain ha ki railing ka dei kaba la pyntip ha ka 22 tarik Risaw, 2019.
Ula ong ba kane ka kam ka dei kaba sngewkhia bha bad ka dei kaba ijlo ban peit khamtam ba ka Khyndailad ka dei ka jaka ba ju rung ju mih ki nongshangkai pyrthei kiba wan sha Jylla.
Haba jubab, u Symbud Myntri Rangbah ba khmih ia ka Tnad Urban Affairs Bah Sniawbhalang Dhar ula ong ba kam shym la don satia kano kano ka jingujor halor kane ka kam.
Hynrei ula kular ba un sa bthah ia ki Ophisar ban peit ba ym dei ban don ne shah iano iano ruh ban thad jain ha ki railing, kiba la shna khnang ban iada ia ki paidbah.
