Nongpoh, Nailar 01: U MLA ka Nongpoh Constituency u Bah Mayralborn Syiem ula pynpaw ia ka jingsngewkhia halor ka jingkiew jong ka jingiaid jong ki briew kiba la suba jur ba kidei ki mynder ri kiba wan rung shapoh ka jylla Meghalaya bad ula maham ba ka jingbteng ka Assam ban pynlong ia ka jingkhynra kala pynsyier ia ki paidbah kiba sah ha ki khappud.
Ula ong ruh ba ka jingdon ia u pud u sam hapdeng kine ki ar tyllli ki jylla kala pynlong ia ka Meghalaya ban buh ha ka jingma na ka jingwan rung be-ain ki mynder ri.
“Ka mat jong ka jingwan rung kyrthep ki mynder ri kam dei shuh kaba thymmai. Ka pynlong ia baroh ki nongshong shnong, ka sorkar bad ki nongthawain ban don ia ka jingsngewkhia. Kam dei eh tang hapoh ka jylla Meghalaya hynrei ka iar ruh wat ha ka thain mihngi jong ka ri kum ka West Bengal, Bihar, Nagaland ne Assam,” ong u Bah Syiem haba iakren bad ki nongthoh khubor.
Haba phai sha ka jingkyndang ka sorkar Assam ia ki mynder ri, ula ong, “Ki jingtip kiba la ioh kila kdew ba kitei ki briew kiba la shah kyndang kidei ki briew kiba la shu sah be-ain, ia kaba la ngeit ba kiba bun na ki kidei kiba na ka ri Bangladesh. Kane ka pynsyier ia ki paidbha ki jong ngi, namar uno uno ruh u lah ban rungtuh lyngba ka thain khappud ha kano kano ka por”.
U MLA ula ong, ba u lah dep ban iasyllok bad ki bor pyniaid district bad pynsngew ruh ia kane ka mat sha ka sorkar jylla ban dawa ba dei ban don ia ki atiar kiba khlain ban pyrkhing ia ka jingwan rung ki briew kiba nabar. “Ngi dei ban pynthikna ba kane ka rukom leh kam dei ban pynthud ia ka jingsuk bad jingiatylli jong ka jylla jong ngi. Ki kaiphod bad ki jingjia kiba la pyni da ki sengbhalang bad ki Dorbar Shnong ki long ki mat kiba sngewkhia bha” ula bynrap.
U Bah Syiem ula kyntu ia ki bor District, Dorbar Shnong, Seng Samla, Seng Longkmie, Seng Kynthei bad ia ki seng bad ki kynhun bapher jong ka imlang sahlang ba kin long kiba husiar bad kiba peitngor bha bad ula pynrem jur ruh ia kito kiba la ai jaka rieh ia ki mynder ri.
“Uno uno uba iada ne iarap ia ki mynder ri kiba la phet na ka jylla Assam ym dei ban ailad satia ia u. Haba ka don ka tdem, kan don ka ding kumta ngi hap ban long kiba husiar bha” ula banjur.
Halor ka rukom treikam jong ki shipai Border Security Force (BSF) ha kaba iadei bad ka jingwan rungtuh ki briew na ka ri Bangladesh, u Bah Syiem ula kubur ba kila don ki jingdkoh. Kumno ki lah ban rung? Ka mut da mano mano kiba iarap bad ban ai jaka sah. Ngi dei ban wad ban lap bad ban pynsangeh mardor shi syndon ia kane ka jingai jingiarap” ula ong.
Ula iengskhem halor ka jingdonkam ban iada ia ka jinglong ba kyrpang jong ka jylla Meghalaya bad ula ong, “Ka jingsuk bad ka jingkmen kaba ngi mad kadei ban iai bteng. Ki bor synshar tynrai bad ka rukom im kam dei satia ban shah ktah eiei, ban pynlong ia ka jylla ka jong ngi kum ka bneng na ka bynta ki briew ki jongka.
