Shillong Nailar 14: Ka Meghalaya SSA Schools Association (MSSASA) kala pynpaw ia ka jingsngewkhia kaba jur halor ka jingbthah ba dang shen, ban aiti ia ka mang tyngka bad ia ka jingdonkam ia ka pisa na ka bynta ki tulop jong ki nonghikai lyngba ka Megh-SIMS Portal.
Ha ka shithi kaba la phah sha u Director ka School Education & Literacy, ka Association kala pynpaw ia ki katto katne ki mat kiba donkam ban shimkhia ha shwa ban pyntreikam ia katei ka sienjam.
Ka Association kala kynnoh ruh ba kala don ka jingbakla ha ka jingpynrung ia ki jingtip da ka Megh-SIMS Portal bad ong, “Bun ki jingtip shaphang ki nonghikai SSA kaba kynthup ia ki kyrteng, ka Tarik ba ki sdang trei ia ka kam bad kiwei pat ki kot ki sla jong ka jingtrei ka jongki, kidei kiba la pynrung bakla ha ka portal/database, kiba lah ban ktah ia ka jingpyniaid shakhmat ia ka jingsiew ia ka tulop bad ia ka lawei jong ki kot ki sla ha ka jingshakri”.
Kala pynpaw ba ki Nonghikai/Head Teacher kim lah ban peit ne leh eiei ia ka Megh-SIMS Portal ban pynshisha ne pynbeit ia ki jingtip kaba dei ka jongki shimet bad ki jingtip ha ka kam shakri, ka buh ha ka jingma ia ka jingbteng ia ki jingbakla bad ka jingbym ai ia ka hok ia kiba bun ki nonghikai kiba la shah ktah.
Katto katne ka kyrteng jong ki nonghikai kam shym la mih ha ka Megh-SIMS Portal, kala pynlong kaba eh ban kynthup ia ki ha ka jingbhah tyngka bad ka jingdonkam ia ka pisa, kaba lah ban lam sha ka jingpynslem ne ka jingbym ai ia ka tulop, la ong ka Association.
Ka Association kala kyntu ia u Director ka School Education & Literacy ban shimkhia ia kitei ki mat bad ban leh eiei noh mardor ban pynbeit ia kitei ha shwa ban pyntreikam ia katei ka sienjam kaba thymmai ban kair na kino kino ki jingeh kiban mih na ka bynta ki nonghikai kiba shah ktah.
 kala pynpaw ia ka jingsngewkhia kaba jur halor ka jingbthah ba dang shen, ban aiti ia ka mang tyngka bad ia ka jingdonkam ia ka pisa na ka bynta ki tulop jong ki nonghikai lyngba ka Megh-SIMS Portal.){kind=link}