SHILLONG, Naiwieng 03: U MDC ka Mawhati u bah Charles Marngar ula kam ba ka jingiakynduh jingeh ki nonghikai Adhoc, SSA bad ki nonghikai kontrak hapoh ka jylla ka la pynlehraiñ ia ka jylla bad ka pynduh ruh wat ia ka hok pule ki khynnah.
Ia kane u bah Charles u la ong haba shim bynta haka jingiatai halor ka Motion bala wanrah da u MDC ka Shella Constituency u Bah Teiñwell Dkhar.
U bah Charles u la ong ba ka jingbym lah ka sorkar ban peit iaka jingeh ki nonghikai khamtam ki skul Primary ka long ka jinglehrain iaka jylla baroh kiwei namar jan man ka por ki nonghikai ki hap ban mih sha surok ban dawa iaka ka hok.
U la tyrwa ba lada ka sorkar jylla kam lah ban iarap iaki nonghikai ne ki skul khamtam iaki skul Primary, ka district council kadei ban shim ka jingkitkhlieh ban tynrong lem iaka jingeh kaba ki nonghikai ki ia kynduh jan man ka por.
Halor kane, u EM ba peit ia ka tnat Pule Puthi bah Martle Mukhim u la ong ba kam ju don kano kano ka jingtyrwa na ka sorkar ban pyniaid biang noh da ka district council ia ki skul kiba ka sorkar ka la shimti ha ki snem kiba kham mynshuwa.
U bah Martle u la kubur ba ka jinglong jingman ka tnat pule puthi jongka sorkar jylla ka sniew dur palat liam ban ia ki por baroh bad u la ong ruh ba i kumba kan khyllem syndon hi jraiñ.
“Ka jingeh kaba ki nonghikai bad ka jinglong jingman ka pule puthi ha ka jylla ka dei namar ym don briew kiba biang bad kiba lah ban peit ia kane ka tnat kaba kongsan eh jong ka jylla” la ong u bah Martle.
U bah Martle u la ong ba ka long ka jinglehraiñ ban iohsngew ba ki nonghikai ki duh tulop da ki bnai bad kan jia aiu lada ki MDC ki duh tulop tang shibnai ruh bad kum ki MDC dei ban don ka jingsngewkhia kaba khraw ia ki nonghikai.
