Agartala, Naiwieng 03 : Ka jylla Tripura kala sakhi ia ki jingjia shah leh beijot bad ki kam thombor pyrshah ia ki kynthei bad ki kam ia umsnam na ki kam sain hima sima bad ki kam khaii drok naduh kine ki khyndiat bnai ba la dep, kata khyndiat bnai shwa ba ka jylla kan leit sha ka assembly ilekshon.
Na ka liang ki kynhun liang pyrshah kila kynnoh ia ki pulit ka Tripura halor ka jingai jingkyrshan ia ki briew jong ka BJP. Katkum ki pulit, ka Tripura kala rejistar haduh kumba 300 tylli ki case kam pyntriem tang ha ka shi bnai, bad napdeng kine 14 tylli ki dei ki jingjia shah leh beijot.Haduh kumba 23 ngut ki briew kila shah pynngat ha kaba iadei bad ka jingdonkti ha ki kam leh beijot, hynrei katto katne ki dang don hapdeng ka jingphet rieh.
Na ka liang ki bor pulit kila kyntait halor ki jingkynnoh ba aijingkyrshan ia ki briew jong ka BJP kiba donkti ha kiba bun ki kam pyntriem.
U Myntri Rangbah (CM) ka jylla u Manik Saha ula pynpaw ka jingsngewkhia kaba jur ha kaba iadei bad ka jingkiew jong ki kam pyntriem pyrshah ia ki kynthei da kaba ong; “Kine ki jingjia kim ia don bynta ei ei ruh ba ki kam sain hima sima lane bad kino kino ki party.Ki dei ki riew bymman hakhmat jong ka ain bad ka imlang ka sahlang kumjuh.Kumta tang ki lynti jingpynshitom kim pat biang satia ban tehlakam ia kine ki kam pyntriem lymda ka imlang sahlang hi kan long kaba iatylli bad kaba niewkor ia ki kynthei bad ruh ba ki kmie ki kpa kin ialam iala ki khun ha ki lynti kiba dei.”
Nalor kata ula ong ruh ba ki kam leh beijot bad kiwei pat ki kam jrong kti pyrshah ia ki kynthei kila long ka daw ka jingkhuslai kaba jur mynta la bun bun snem, hynrei haba phai halor ka jingdon jong kiba shah lehbor la iohi ba ka dang kham jur shuh shuh ha ka por jong ka jingsynshar communist.
Na ka liang ka Chairperson jong ka Tripura Women Commission ka Barnali Goswami kala ong ba kila pynlong ka jingleit jngoh sha ki longiing jong kito ki lanot bad shim ruh ia ka jingphla ka jong ki, bad kila aijingmut ruh ia ki bor pulit ba kin pynsted ha kaba iadei bad ki jingtohkit na ka bynta kawei pa kawei ka jingjia.
