Shillong, Lber 06: U Symbud Myntri Rangbah ka jylla u Bah Prestone Tynsong ula pynpaw iaka jing sngewkmen ba haka jingpyntian smai ia u Myntri Rangbah ka jylla ryngkat bad ki Myntri Sorkar la wan ban sakhi da u Myntri Rangbah duh ka ri u Narendra Modi bad u Myntri Kam Pohiing ka ri u Amit Shah.
“Ka dei ka sngi jong ka jingsngew sarong iaka jylla jong ngi, namar ka dei ka sien kaba nyngkong eh ba ha ka jingpyntian smai ia u Myntri Rnagbah ka jylla ryngkat bad ka kynhun myntri la wan ban sakhi da u Myntri Rangbahduh ka ri, u Myntri Kam Pohiing ka ri. Kane ka long ka burom kaba khraw ia ka jylla hi baroh kawei” ong u Bah Prestone hadien bala dep ban bamsmai kum u Symbud Myntri Rangbah ka jylla.
U Bah Prestone ula ong ka jingdon ar ngut ki Symbud Myntri Rangbah ha ka sorkar ka long kaba donkam.
“Ngi la kheiñ bha ba la kumno kumno donkam ban don sa ia uwei u Symbud Myntri Rangbah na ka rilum Jaintia kumta ngi la ia pynbeit ban kyntiew kyrdan noh ia u Ma Sniawbhalang kum u Symbud Myntri Rangbah” ong u Bah Prestone.
Ula ong, hadien ba la dep ban pyntian smai ia u Myntri Rangbah bad ia ka kynhun myntri, shen kin leit ban phai noh sha ka kam ban bteng biang iaka jingtreikam naka bynta ban pynurlong ia ki jingangnud jong ki paidbah ka jylla.
