Shillong, Jymmang 03 : Ka Tnad Animal Husbandry & Veterinary ka Jylla, kala sngap man man khlem ka jingpyrwa ia ka koit ka khiah u paidbah halor ka jingsyllad jong ka khlam sniang (African Swine Flu) ha Ri-lum Khasi, kaba la pynthikna da ka North Eastern Regional Diseases Diagnostic Laboratory ka Assam.
Kat kum ka kaiphod na u Deputy Director ka Animal Health Centre (NERDDL), la pyntip ba kane ka khlam sniang kala don ha East Khasi Hills, West Khasi Hills bad Ri-bhoi bad la pynthikna ia kane lyngba ki snam bala shim nuksa na ki sniang (sample) bala leh test hapoh kane ka Laboratory.
La pyntip ba kine ki nuksa jong ki snam sniang la shim na ka farm ri sniang ka Sorkar kaba don ha Pynursla, East Khasi Hills, na ka farm ri sniang ha Nongkasen, West Khasi Hills bad na ka Nangiaikyrsoi SHG, Umsawniang, Ri-bhoi.
Ka kaiphod ka pyntip ba ka Tnad Animal Husbandry kala phah ia kine ki nuksa snam sniang sha ka NERDDL naduh ka 13 tarik u Iaiong bad ia ka kaiphod jingshem la aiti sha u Director ka Tnad ka Animal Husbandry naduh ka 19 tarik Iaiong.
Kat haduh ba thoh ia kane ka khubor, kam pat don satia kano kano ka jingpynbna na ka liang ka Tnad Animal Husbandry & Veterinary ka Jylla halor kane ka jingpang khlam ki sniang ne pynmih ia kino kino ki jingbthah ban tehlakam ia ka jing saphriang jong kane ka khlam sha ki shnong ki thaw ba marjan kitei ki farm ne ka jingbthah ia ki briew ba kin phikir ia kane ka jingpang.
Kat kum ki khubor ba iohlum, kila don bun ki jingjia ba iap ki sniang ha Ri-Bhoi District kaba lah ban dei na kane ka khlam. Hynrei hapdeng kine ki jingjia, ki Ophisar na ka tnad kila kam ba kim pat shym la ioh pdiang satia ia kum kane ka kaiphod naka NERDDL.
Wat hapdeng kane ka jingpynthikna ba don ka khlam, hynrei ka jingdie ia ki dohsniang bad ka jingwan pynpoi ia ki sniang na kiwei ki Jylla sha Meghalaya kala iaid khlem kano kano ka jingpyrrkhing.
