Shillong, Jylliew 06: Kum shi bynta jong ka jingrakhe ia ka World Environment Day, ka Meghalaya Legislative Assembly kala pynlong ia ka jingthung dieng ha ka Assembly Complex kaba thymmai ha Mawdiangdiang, da ka jingiengskhem jong ka jylla halor ka jingkut jingmut ban tyngkai bad sumar ia ka jinglong jingman ka mariang bad ka jingiakhun ia ka jingkylla ka suinbneng.
Ha kane ka prokram la wan ban iashimbynta da u Lamphang ka iing dorbar thawain ka jylla u Thomas A Sangma, u Myntri Rangbah ka jylla u Conrad K Sangma, u Symbud Lamphang u Timothy D Shira, ki Symbud Myntri Rangbah u Bah Prestone Tynsong bad u Bah Sniawbhalang Dhar bad ki myntri sorkar kiba kynthup ia ka Dr. M Ampareen Lyngdoh, u Marcuise N Marak, u Bah Comingone Ymbon, Bah Paul Lyngdoh, Bah Shakliar Warjri bad u A.T. Mondal. Nalor kane la iashimbyntalang ki MLA kiba kynthup ia u Bah Sosthenes Sohtun, Bah Nujorki Sungoh, ki heh ophisar jong ka Assembly kiba kynthup ia u Commissioner & Secretary Bah Andrew Simons, u Secretary u Malthus S Sangma, ki ophisar na ka tnad Forest bad ki nongmihkhmat na ki tnad sorkar bapher bapher.
Banjur u Myntri Rangbah ban nang pynbun ia ki jaka khlaw bad ka jingkhuid ki jaka sor
Haba ai jingkren ha ka jingialang u Conrad K Sangma ula ai ka jingbatai kaba bniah ia ki jingthmu jong ka sorkar ban pynneh pynsah ia ka mei mariang:
“Ha kine ki 7 snem kiba la dep, ka Meghalaya kala dep ban bynrap sa kumba 22,000 hektar ki jaka khlaw bad thung kumba 2 klur tylli ki tynrai dieng. Ka thong ka jong ngi ka long ban sha ka pynkiew sha ka 40,000 hektar ka jingdon ki jaka khlaw ha kine ki 5 snem kiban wan”.
Ula kdew ruh ia ka jingpyntreikam ia ka Payment for Ecosystem Services (PES) programme:
“Hapoh ka PES, ka jingai jingiarap pisa kaba la ai beit beit sha ki shnong ki thaw kiba pynneh ia ki khlaw ki btap. Palat T.42 Klur la dep ban pyllait, ban kyrshan ia ka jingiada ia ka 52,000 hektar. Da ka jingkyntiew ia ka Green Meghalaya Plus initiative, ki shnong ki thaw mynta ki lah ban ioh haduh T.20,000 ha ka shi hektar, da ka jingthmu ban pynneh pynsah ia ka 1 lak hektar.”
U Myntri Rangbah ula batai ruh halor ka jingsdang dang shen ia ka ‘Mission Clean Shillong 2027’, kaba la pynwandur ban pynbha ia ka jingkhuid jingsuba kum shi bynta jong ka jingpynkhreh ia ka National Games:
“Ngi lah treikam da kaba iaid da ka mishon, la kadei ban kyntiew ia ka jingdon ki briew ban lum ia ki jaboh ne ban trei ia ki kam kiba iadei bad ka Bio-Mining ha Marten, ha kaba 50% jong ka jingdon ki nuit bad ki jaboh la dep ban pynkhuid. Ki juh ki jingshimkhia yn sa leh ha Tura, Jowai bad kiwei kiwei ki jaka”.
U Lamphang ka iingdorbar u Thomas A Sangma ula banjur ia ka jingdonkam ban pyniasoh ia ka jingkitkhlieh ia ka mariang ha man la ki jingpynwan dur ha ka
Assembly Complex kaba thymmai.
“Kane ka jaka kadei kaban pyni iaka jingtei kaba katkum ka juk ba mynta kaba don pat ia ka tyllong ha ka jingsngewkhia ia ka sawdong sawkun jong ka mariang. Man la ki dieng kiba la thung mynta ka sngi kadei ka jingkular na ka bynta ki pateng kiban dang wan”.
Ula kyntu ia ki jingdonkam ban don ka jingiashimbynta lang da baroh ha ka jylla baroh kawei, da kaba ioh mynsiem na ka shnong Mawlynnong, kaba dei ka shnong kaba khuid tam hapoh ka dewbah Asia.
“Lada kawei ka shnong ka lah ban long ka shnong kaba khuid tam ha Asia lyngba ka jingtrei shitom jong ka shnong ka thaw, kumta ka jylla baroh kawei ruh ka lah ban poi sha kane ka kyrdan. To ngin iatrei lang ban pynlong ia ka Meghalaya ha kaba man la ki lum kin long kiba jyrngam, man la ki wah kiba tuid kin long kiba khuid bad man la ki khynnah kin ioh ring mysniem ia ka lyer kaba khuid”.
U R.S. Gill, Principal Chief Conservator of Forests & Head of Forest Force, ula pynshai halor ka jingriewspah ka jylla ha kaba iadei bad ka riti dustur tynrai ha kaba ki shnong ki thaw kila shimkhia ban iada ia ka mariang.
“Na ki law kyntang sha ki jingkieng jri, ka Meghalaya kadei ka nuksa kaba im ha ka jingsdang ban pynneh pynsah. Ki Prokram kum ka Green Meghalaya bad Green Meghalaya Plus kila bteng ia ka nam ban pynkup bor ia ki paidbah ban iada ia ka mariang”.
Ula kubur ba ka jingkynshew tyngka ka sorkar jylla na ka bynta ban pynkhlain ia ki bynta kiba iadei bad ki khlaw ki btap.
“Ka jingkyrshan ha ka rukom ban kyntiew ia ki iing bad ia ka leit ka wan kala long ka jingiarap kaba khraw ha ka jingtreikam bha bad ia ka burom jong ki nongtrei kiba hakhmat ki jong ngi”.
Ka jingkut jingmut lang ia ka lawei kaba bit ka biang:
La pynkut ia ka prokram ha kaba baroh ki heh ki hain kila iashimbynta ha ka jingiathung dieng ha kylleng ki bynta jong ka Assembly, kum ka jingiengskhem ha kaban bat ia ka jingkular ban iada ia ka jinglong kyrpang ka Meghalaya ha ka jingdon ia ka mariang na ka bynta ki pateng ban dang wan.
