Shillong, Lber 02 : Ka National People’s Party (NPP) hynne ka sngi palei, kala smai ban nang trei shitom shuh shuh na ka bynta ki paidbah ka Jylla Meghalaya hadien ka jingioh khur ia ka jingjop kum ka party ba don bun eh ki MLA hapoh ka Jylla.
“Nga ai khublei ia ki paidbah ka Jylla ba ki vote ia ka party jong ngi” ong u National President ka NPP bad Myntri Rangbah ka Jylla Conrad K Sangma haba iakren bad ki nongthoh khubor hadien ka jingshah jied biang kum u MLA ka South Tura, bad pynliem ia u kyrtong ba ishut reng eh jong ka BJP u Bernard N Marak.
Ula ong ba ka Party kan sa rai ba kumno kan jam shakhmat hadien bala pynbna ia ka result hynne ka sngi.
Hadien ka jingjop biang na Pynursla constituency, u National Vice President ka NPP bad Symbud Myntri Rangbah ka Jylla Bah Prestone Tynsong ula ong “Nga ai khublei ia ki paidbah kiba la ai ka jingshaniah ha ngi, Ngin nang trei kham bha shuh shuh”.
Haba pynpaw ia ka jingsngewsih ba ka party kam shym la tam ia u magic nombor, u Bah Prestone ula ong “Watla katta, ngi smai ban trei shitom shuh shuh na ka bynta ki paidbah jong ka Jylla”.
Haba kylli la ka NPP ka kloi ban iatreilang bad ka BJP, u Bah Prestone ula ong “Ngan ong ha phi ba kam shym don satia ka jingiapynbeit haba phai sha ka MDA bad ngin sa shim rai. Nyngkong nga dang ap ia u Myntri Rangbah. Un sa wan poi ha Shillong mynta ka miet bad ngin sa shong bad shim ia ka rai”.
La u Nongialam ka BJP Himanta Biswa Sarma un long biang u nongpynwandur ia ka Sorkar ha Meghalaya, une u Nongialam ka NPP ula ong “U Myntri Rangbah ka Assam u dei u Chairman ka NEDA bad ula khmih ia baroh ki Jylla ka thain Shatei Lam Mihngi bad namar kata, u Myntri Rangbah (Conrad) ula iakynduh ia u hynrei kam mut pat ba un dei u nongpynwandur ha ka jingthaw ia ka Sorkar. Kam long kumta. Kumba nga ong ha phi mynta ba ngin sa shong jingialang tang para ma ngi bad ngin sa shim rai bad no ngin iatreilang”.
Halor ka jingdawa ba u Myntri Rangbah un dei noh na Ri-lum Khasi Jaintia, u Bah Prestone ula ong ba ki paidbah kila ai ia ka rai kaba pra lyngkhot lyngkhai ha Khasi Jaintia Hills bad kyrpad ia ki paidbah ban um wanrah ia ka jingsngew pher jaid bynriew na ka kam Myntri Rangbah ka Jylla.
“Wat ka party thymmai ba dang shu pynkha ar-lai bnai mynta kala ioh haduh 4 seat lada ngam bakla..namar kata ban phohsniew ba ngin ioh ia u Myntri Rangbah na Khasi lane Jaintia ha ka jingsngew jong nga, nga sngew ba ngim dei ban kren eiei namar ngi dei baroh ki nong Meghalaya la ki dei ki Khasi, Jaintia lane ki Garo. Ngi dei ki nong Meghalaya” ula ong.
Haba kylli la ka NPP kan thaw biang ia ka Sorkar MDA-II bad ki juh ki paralok, u Bah Prestone ula ong “Ka sorkar synrop kan sa don beit hynrei ym tip la kan dei ka MDA-II lane kiwei ki kyrteng bad ngin sa rai bad sa pyntip sha phi”.
Ula pyntip ba baroh ki MLA ba thymmai jong ka Party kin sa shong shen bad u Myntri Rangbah ka Jylla ban shim rai halor ka kam iatreilang bad kiwei ki seng sain pyrthei.
