Shillong, Naiwieng 04 : Ka North Eastern Hill University (NEHU) kala sakhi ia ka jingsangeh lut ki kam ki jam hynne ka sngi Nyngkong namar ka jingsdang iakhih jong ki Nongtrei (non-teachning staff) kiba la sangeh treikam khlem pud ban pyrshah ia ka jingpynslem ha ka jingkyntiew kyrdan bad pyniaid ia ka eksam thungkam bala pynbna laitkam naduh ka 3 tarik Naiwieng 2023.
Haba iakren bad ki nongthoh khubor, u Presidnet ka NEHU Non-Teaching Staff Association (NEHUNSA) Dr WR Synrem ula ong ba ka Association kala hap ban pynlong ia kane ka jingiakhih namar ba ka jingdon jong ki nongtrei (non-teaching staff) ha Shillong bad Tura Campus kala duna shaba palat.
Ula ong ba kat kum ki kyndon ka University Grant Commission (UGC), ka ratio ne jingdon ki nongtei ka dei ban long 1:1.1 kaba mut baka jingdon jong ki nongtrei ka dei ban long 512 ngut.
“Hynrei sngewsih, ka jingdon ki nongtrei mynta ka long tang 250 ngut kynthup ia ka Tura Campus bad mynta u snem kumba 50 tam ki nongtrei kila shongthait. Lashem snem ruh, ki nongtrei ki ban shongthait kin long kumjuh. Kumta lada ka jingthungkam kam don, ngi sheptieng ba mano ban trei hapoh ka University bad kumno ka University kan treikam khamtam ki nongtrei kiba iadei kam bad ki nonghikai bad ki samla pule. Baroh ki kam kin sa shah ktah lut lada kim don ki nongtrei” ong u Dr Synrem.
“Kumta, ngi la rai ban pynbteng ia ki jingiakhih jong ngi tad haduh ba ki bor khmih kila ai ia ka jubab kaba biang ba lano kan pynlong ia ka eksam thungkam” ula bynrap.
Haba kylli, u President ka Association ula ong ba kat kum ki khubor ba ioh, ki borkhmih kin sa khot ia ka Association ban iakren lashai ka sngi.
“Ngi kyrmen ba ka jingiakren kan long kaba seisoh bad ngim kwah ruh ia ki briew ba kin shah ktah namar ki paidbah kin sa iakynduh jingeh shisien ba ngi sangeh treikam hynrei la bor ia ngi ban shim ia kane ka sienjam khnang ban im ka University” ula ong.
Shuwa kane, ka National Testing Agency ka dei ha kaban pynlong ia ka eksam thungkam hynrei ka NEHU kala ioh pdiang ia ka shithi na ka, kaba pynpaw ba kam lah satia ban pynlong ia kane ka eksam. Kumta, ka NEHU kala pynmih ia ka Expression of Interest (EOI) bad la khmih lynti ba kin don ki agency ki ban sa pynlong ia kane ka eksam thungkam.
Haba kylli halor ka jingdawa jong ka NEHUTA bad NEHUSU, u Dr Synrem ula ong “Ngim don bynta pura satia bad ki hynrei ngi la ai ia ka shithi jingkyrshan ia ka jingdawa ba kila dawa bad palat ia kata, ngam don eiei ban kynthoh”.
Halor ka jingtreikam u Vice Chancellor ba mynta, u President ka Association ula ong “Kum u khlieh ka University, la khmih lynti ia u VC ba un don beit ha Ophis hynrei na ka por sha ka por u ju don shabar ka Jylla. Ngi la iakren bad u hynrei ula pynpaw ba ula shah khot sngewbha na shane shatai bad ba u hap ban leit iashimbynta ha ki prokram bad kine kiei kiei baroh kila ktah bha ia ka University”.
, ka ratio ne jingdon ki nongtei ka dei ban long 1:1.1 kaba mut b aka jingdon jong ki nongtrei ka dei ban long 512 ngut.){kind=link}