Shillong Naitung 19: Ka kynhun jong ka Khasi Hills Autonomous District Council (KHADC), shen sa kan leit ïakynduh ïa u Myntri kam Pohïing ka Sorkar Pdeng u Amit Shah ban aiti ia ki jingpynsngew jong ka Council ha kaba iadei bad ka jingthmu pynkylla ïa ka Sixth Schedule ka riti synshar ka ri India.
Ïa katei la pyntip da u Deputy CEM ka KHADC Bah Pynshngain N Syiem hadien ba la wai ka jingïalang jong baroh ki MDC kaba la long haka sngi Palei.
Haba iakren bad ki lad pathai khubor, u Bah Syiem ula ong, ba ka Executive Committee kala rai ban khot ia ka jingialang kaba kyrkieh jong baroh ki MDC hadien ki dak ki shin kila paw ba ka Sorkar Pdeng ka lah ban wanrah ia ka jingpynkylla ia ka Sixth Schedule ha ka Dorbar Parliament ban wan, ka ban sa long shen. Katkum ka jingong jong u, ki nongïalam na Tripura kila shimkhia ban iakren ïa kane ka kam bad u Amit Shah dang shen.
“Ha kine ki sngi ban wan, ngin sa leit ïakynduh ïa ki heh ophisar jong ka MHA bad wat ïa u Myntri kam Pohïing ka Sorkar Pdeng ban aiti ia ki jingpynsngew bad jingai jingmut jong ngi halor kane ka kam”, u la pyntip.
“Kumba phi tip ka 125th amendment ba la wanrah ha u snem 2019, ka Parliament ka la thaw ruh ïa ka Parliamentary Standing Committee kaba la khlieh da u Anand Sharma. Kila wan sha nongbah Shillong ban sngap ia ki jingai jingmut bad ki jingpynsngew jong ki District Council, ki sengbhalang, ki seng sain pyrthei. U Sharma ula dep aiti ïa ka kaiphod jong ka Parliamentary Standing Committee bad ngi sngewthuh ba kane ka kam mynta ka don ha ka kyrdan kaba khatduh”, u la ong.
Shuh shuh u Bah Syiem ula pyntip ba ka jingïalang mynta ka sngi kala rai ban pynkynmaw biang ïa ka nongrim kaba ka KHADC ka ieng halor ki mat bapher bapher.
“Ngi la rai ba ngin pynthikna ba ka kyntien Dorbar Shnong ha ka jaka jong ka Village Council bad ka town committee/town dorbar ha ka jaka jong ka Municipal Council dei ban pynrung ha ka jingthmu ban pynkylla thymmai,” ula ong bad ka bynrap ba “Ia u Rangbah Shnong dei ban jied da ka dorbar shnong, Hima ne Elaka katkum ki kyndon jong ki District Council bad ym dei ban pynlong da ka tnad elekshon jongka jylla. Hooid, ha kaba ïadei bad ka jingjied ia ki dkhot jong ka district council, kan long katkum ki kyndon elekshon jong ngi ban pynïaid da ka State Election Commission.”
“Ngi pynkynmaw biang, ba ym dei ban kynthup ïa ka kyntien Unrepresented Tribe bad ba dei ban kdew tang ïa ka jingdon jong ki dkhot ba la jied baroh ha ka jingthmu ban pynkylla thymmai,” ula bynrap.
Haba ia dei bad ka jingbun ki Seat, u Bah Syiem ula ong, ba ka KHADC ka don ia ka jingmut ba dei ban pynkiew sha ka 37 tylli ki Seat ha kaba 35 ngut kin dei kiba shu jied da ki paidbah bad 2 ngut kiba shu thung.
“Ngin sa iakren bad ka sorkar jylla khnang ba ka jingpynsngew jong ki MDC kan iahap bad ka jingai jingmut jong ka sorkar jylla khnang ba kan nym pynmih ia kano kano ka jingkulmar ia ka MHA bad ia kiwei pat ki tnad halor katei ka kam”, ula ong.
Katkum ka jingong jong u Bah Syiem, ïa ka District Council la pynrung ha ka Article 280, ban pynthikna ïa ka jingai pisa na ka Sorkar Pdeng katkum ka jingthmu ban pynkylla thymmai ïa ka Sixth Schedule.
“Hynrei mynta ki District Council kila rung ha ka Article 280 hynrei ngi la pynneh ba ka kyntien District Council, Dorbar Shnong, Town Committee dei ban pynrung lang khnang ba kan nym ktah ia ka rukom synshar jong ngi”, ula ong.
