Gangtok, Lber 13: Ki shipai Indian Army ki la ioh ban pyllait ia kumba 400 ngut ki nongwan shangkai pyrthei kiba la sahkut ha ka lynti surok hadien ka jinghap thah kaba jur hapoh Sikkim, bad hadien ki la pynioh ruh ia ki lad jingiarap kiba kyrkieh, kaba kynthup ia ki lad jingsumar bad ka bam ka dih, ong ka tyllong khubor shipai hynnin ka sngi U Blei.
U nongaiktien ki shipai u Lt. Col Mahendra Rawat u la ong ba ki don haduh kumba 400 ngut ki nongwan shangkai pyrthei kaba kynthup ia 142 ngut ki longkmie bad 50 ngut ki khynnah kiba wan da kumba 100 tylli ki kali kiba la sahkut noh ha ka lynti surok has kane ka janmiet sngi Saitjain ba la lah katba ki dang wanphai na Natu La bad na Tsomgo (Changgu) Lake hapoh Sikkim.
U la ong ba ki shipai na ka tnat Trishakti Corps ha ryngkat ka jingiatreilang bad ki bor pulit bad ki riew paidbah mardor ki la leit ban aijingiarap ban ioh pyllait ia kitei ki briew lyngba ka “Operation Himrahat”.
Kane ka jingai jingiarap kala bteng baroh shi miet ha katei ka sngi Saitjain ba la lah. Hadien ia kine ki nongwan shangkai la pynkynriah noh sha ki jaka kiba shngain bad pynbiang ia ka jaka sah ha ryngkat ki jain syaid, ki lad jingsumar bad ka bam ka dih.Ki bor shipai ki la lah ban pynbiang ia baroh ki jingdonkam jong kine ki briew, ong u nongaiktien.
Nalor kata u la ong ba ha ka step sngi U Blei ba la lah, la ioh ban pynkhuid pat ia ka surok lyngba ki kali puh shilum jong ki shipai, bad kat haduh ka por 9 baje mynstep la lah ban pynkhuid ia baroh ka lynti surok bad ba ki kali ki la lah ban leit shapoh Gangtok.
