Gangtok, Rymphang 28: Ka Sorkar Jylla Sikkim, ka la pynmih iaka hukum ba mana ban pyniap iaki jait mrad ha katei ka Jylla, na ka bynta 15 sngi kaba sdang naduh 28 tarik Rymphang.
Kane ka jingmana ban pyniap iaki jait mrad kadei ban rakhe ia ka taiew ba kyntang jong ki riewngeit Buddhist ha ka Calendar jong ki nong Tibet.
Ka hukum ka bthah ia baroh ki dukan die doh ha Sikkim kin khang haduh 15 sngi.
Ka tnat Ecclesiastical ka la shim ïa ka rai ban khang ïa ka jingpynïap bad die doh naduh ka 28 tarik Rymphang haduh 14 tarik Lber 2025.
Ka hukum ka kdew ba lah ban shah ban wanrah doh na shabar ka Jylla tang ha ki jingjia bym lah ban kiar kum ka jingkhawai shongkurim, ki jingïalang paidbah, bad na ka bynta ban ai bam ïa ki mrad haki jaka ri mrad (Zoo).
“Ki nongwanrah doh na shabar ka Jylla ki dei ban pan jingbit shwa na ka tnat,” la ong ka hukum.
“Ki dukan kiba die dohkha ki lait na kano kano ka jingkhang die, watla kan long kaba bha lada kin nym die dohkha kum shi bynta ban burom ia ki jingsngew niam ha kane ka por,” la ong ka jingpynbna.
