Gangtok, Jylliew 16: Kumba 6 ngut ki briew kila iap bad palat 2000 tam ki nongjngohkai pyrthei ki la sahkut na ka jingtwa khyndew bad jingther u slap ha ki bynta ba shatei ka Mangan District jong ka jylla Sikkim.
Kane ka jingjur slap ka dei kaba la sdang naduh ka sngi Palei ha kaba ka surok kaba pyniasoh ia ki thain kiba kynthup iaka Chungthang, Lachen, Lachung, Dzongu ka la dkut noh namar ka jingtwa khyndew.
Ka tyllong khubor ka iathuh ruh ba kawei ka jingkieng nar kaba dang shu dep ban shna shen ha Sangkalang, kaba pyniasoh ia ka Mangan, ka Dzongu bad Chungthang ruh ka pra noh namar ka jingtwa khyndew hadien ka jingther jong u ‘lapbah la bun sngi lynter kaba la wanrah ruh ia ka jingjot jong ki ing ki sem bad ki post ilektrik kiba la shah rat bad shah rong ha ka umsaw.
Na ka liang ki bor district jong ka Mangan ki la kyntu ia ki nongjngohkai pyrthei kiba la sahkut ha katei ka thain ba kin don shwa shipor ha ki jaka sah ki jongki tad haduh ba ki bor pyniaid district kila pynbeit da kiwei pat ki surok ba kin ioh leit phai suk sha la ki shnong ki thaw ki jongki.
Halor kane ka jingjia, na ka liang jong u myntri rangbah ka jylla Sikkim, u Prem Singh Tamang u hukum ia ki heh ophisar ka jylla ba kidei ban shimkhia ban leh ia ka bynta ba donkam ban ai ia ki lad jingiarap ba kyrkieh sha ki paidbah kiba mad ia ki jingeh bad jingjia ba sngewsih ha kane ka por bad ong ruh ba ka sorkar jylla kan don ryngkat bad ki bahaing hasem jong kito ki longing kiba la duh noh iala ki baieid ba thoin ki jongki.
