Gangtok, Risaw 05 : Ka jingiap jong ki briew kala kiew sha ka 14 ngut na ka jingshlei um ba shyrkhei jong ka Wah Teesta ha Sikkim, kaba la wan jia na ka jingther kynsan jong u lapbah lapsan ha ki bynta ba shatei jong ka Jylla.
Kat kum ka khubor, haduh 102 ngut ki briew kila jah rngai kynthup ia 22 ngut ki shipai.
“Palat 22 hajar ngut ki briew kila shah ktah na kane ka jingshlei um. Kat haduh mynta, 2000 ngut ki briew la pynkynriah sha ki jaka ba long lum bad ki shipai Indian Army, NDRF kila lamkhmat ha ka jingleit wad ia ki briew ba jah bad ban iarap ia ki lanot” ong ki Heh ka Sikkim.
La pyntip ba 26 ngut ki briew kila mynsaw bad ki don mynta hapdeng ka jingsumar ha ki Hospital ka Jylla. Kine kiba mynsaw ki dei kiba n aka shnong Chungthang ha Mangan district, Dikchu, Singtam ha Gangtok district, bad Rangpo ha Pakyong district.
Kat kum ka khubor, palat 3000 ngut ki nongshangkai la sheptieng ba kila sahkut ha kylleng ki bynta jong ka Jylla. Haduh 12-14 ngut ki nongtrei kiba pyhtrei ia ka Teesta Stage 3 Dam ha Chungthang ki dang sahkut hapoh ki tunnel jong ka Dam.
Baroh ki skul shimet bad skul Sorkar ha Sikkim kiba don ha ki District ka Pakyong, Gangtok, Namchi, bad Mangan kin dang khang khyrdep haduh ka 8 tarik Risaw.
U Myntri Rangbah ka Sikkim PS Tamang Golay ula kyntu ia ki paidbah ba kin long kiba peitngor bha bad kiar na ka leit jingleit ha kum kane ka por.
