Gangtok, Risaw 04 : Namar ka jingwan poi umsaw kynsan kynsan ha ka Wah Teesta, haduh 150 tylli ki Iing kila julor hapoh ka Industrial Belt (IBM) ha Rangpo, Sikkim bad palat 20 ngut ki riew paidbah kila jah rngai nalor ki 23 ngut ki shipai.
Hynne ka janmiet, ki Pulit kila ioh tam ia kawei ka metiap na ka thain IBM.
Kane ka jingjia kala wan jia hadien ka jingbthei jong ka pung Lhonak hynnin ka miet sngi Ba-ar, namar ka jingshlei um kynsan kynsan na ka jingther u lapbah lapsan.
Ha kiba bun na kine ki iing, ki Iing armala kila shah taplup ha ka ktieh bad ki jaboh jabain ba wan rong ka umsaw.
Kiba bun ki Iing ba shipor jong ki Nongbylla ha ka thain, kila shah rong noh bad bun ruh ki kali kila shah pynjulor. La pyntip ba haduh 3000-4000 ngut ki briew la pynkynriah na Rangpo hynnin ka miet shuwa ka por 2 baje mynstep.
Ka surok NH-10 ba pyniasoh ia ka Singtam bad Rangpo kala shah tyllup ha ki jaboh jabain ha ka thain 21 Mile, harud jong ka Wah Teesta, ia kaba la pynkhuid shaid shaid mynta da ka NHIDCL.
Haba iakren bad ki nongthoh khubor, u Tashi Chopel uba dei u District Magistrate ka Pakyong ula ong “Kala don ka jingduh ki jingim briew bad palat 150 tylli ki Iing kila shah pynjulor ha ka thain IBM ha Rangpo. Ngim pat thikna bha ia ka jingiap ki briew hynrei haduh 20 ngut kila jah rngai na ka thain”.
Ula iathuh ba ula ioh khubor ruh ba haduh 23 ngut ki shipai kila jah rngai na ka thain Bardang kaba don hapdeng ka Singtam bad Rangpo.
Kumba 300-400 ngut ki briew kila poi mynta sha ka jaka sah ba shipor ha ka thain bad ka jingwan ialam ia ki briew ba shah pynjulor ia ki Iing ki sem sha ki jaka ba shipir kan nang iai kiew katba dang iaid ka por, ong ki bor District.
