Guwahati, Naitung 04: Arngut ki briew ki ba la shah kem ki la shah siat iap na ka jingther kuli ki pulit ha kane ka miet sngi Saitjain ba la lah katba ki dang pyrshang ban phet na ka kali (van) ba la set ia ki ha ka thain shathie ka Assam hapoh Cachar district.
Ia kine ki ba la khlad la tip kyrteng kum u Abul Hussain Barbhuiya ia u ba ju khot u Abu, 26, bad u Kamrul Islam ba ju khot u Lakoi, 35 snem rta. U Abdul u dei u nongshong shnong ka Uttar Krishnapur ka ba hapoh Cachar district, katba u Kamrul u dei na Saidpur jong ka district.
Ki pulit ki la ong ba uwei napdeng kine ki arngut u dei u ba la paw kyrteng kum u runar u ba la shah thwet jur hapoh ka district namar ka jingdonkti ha ki kam dawa pisa, kam rahbor, kam tuh kali bad kiwei pat ki kam pyntriem.
Na ka liang ka SP ka Cachar ka Ramandeep Kaur ha ka sngi UBlei ba la lah ka la ong ba ha ka 30 tarik u Jylliew ba la dep la rejistar case hapoh Silchar Sadar Police station ha ka ba iadei bad ka jingjia ther kuli hapoh Rangirkhari jong ka Silchar namar ka jingiaknieh jaka. Hynrei katba ki dang pynlong ka jingtohkit halor kane ka jingjia, la ioh jingtip ba u Abdul Hussain u la don ha ka lynti ban phet krad sha Meghalaya da ka kali.
“Hadien ba la ioh ia kane ka jingtip, ka kynhun pulit ka la ioh ban kem noh ia une u ba la shah kynnoh donkti na ki bynta jong ka Jorabat, Meghalaya. Arngut kiwei pat, ia ki ba la tip kyrteng kum u Lakoi bad u Anowar ki ba la shah thwet halor ki ba bun tylli ki kam bymman ruh ki la shah kem lang na kajuh ka kali.
Baroh kine ki laingut ki runar ki la shah pynkynriah noh sha Silchar da ki artylli ki kali da ki pulit ha ka miet sngi Saitjain ba la lah. Hynrei, hadien kine ki arngut ki ba la shah kem ha ryngkat utei u ba la shah kynnoh donkti ha ka jingiaknieh jaka ki la pyrshang ban phet na ka kali ka ba kit ia ki da ka ba shim kabu namar ka jingdum, ong ka SP Kaur.
“Hynrei namar ka jingdheng kali kaba jur ha ka lynti surok, kumta kane ka kali ka ba kit ia ki ba la shah kynnoh iaknieh jaka ka la sah shadien, katba kawei pat ruh ka kali ka la hap ban iaid suki jai, hynrei kine ki arngut ki runar ki ba don ha ka van ki la phet krad da ka ba shim kabu namar ka jingdum, ong shuh shuh ka heh pulit.
Ha ka ba kum kane ka por u heh pulit ka Silchar u ba synran ia kine ki arngut ha ryngkat kiwei pat ki bor pulit ki la beh thong ia ki bad hadien ki la hap ban ther kuli khnang ban khanglad ia ki. Ka Kaur ka la ong ba la pynkit noh ia kine ki arngut shapoh Kalain primary health centre bad hadien la pynkynriah sha Silchar Medical College and Hospital ha ka ba ki doktor ki la pynbna ba ki la dep khlad.
Haduh kumba 54 ngut ki briew ki la shah pyniap bad 139 ngut kiwei pat ki la ngat ha ki jingmynsaw na ka jingther kuli jong ki pulit halor ki jingkynnoh pyrshang phet na ki jaka set lane ka jingpyrshang thombor ia ki pulit naduh ba ka sorkar BJP hapoh ka jingialam jong u Myntri Rangbah (CM) Himanta Biswa Sarma ka la synshar ia ka jylla naduh u bnai Jymmang jong ka snem ba la dep.
