Gangtok, Naitung 04: Ia ki ngab ki ba ju kham kynrei bha hapoh ka ri Nairobi ha ka thain mihngi ka Africa la sakhi ruh ha ka jylla ka thain Himalaya hapoh Sikkim.
Haduh kumba 100 ngut ki khynnah pule ka SMIT ki la shah ktah hadien ka jingiatyngkhuh bad kine ki ngap ha ki bynta jong ka Majhitar ka ba hapoh Manipal, Sikkim. Ka jingshah ktah lyngba kine ki ngab ka la saphriang sted bha ha ki bynta jong ka Sikkim Manipal Institute of Technology (SMIT).
Uwei na ki khynnah u ba la shah ktah ha kine ki ngap u la iathuh ba u la hap ban phah puid ia la ka jong ka kti. “Kine ki ngap kim ju dait satia. Hynrei, ym dei satia ban ktah ia ki lada ki wan dem ha ki bynta jong ka met ka phad jong phi. Lada phi ktah kine ki ngap ki pynmih ia ka kynja acid ka ba khlain,” ong u heh ka tnat ka koit ka khiah ka Sikkim.
Nalor kata la ong ruh ba haba kine ki ngap ki wan ban dem ha phi, phi dei ban shu sliew suki suki. Lada ki wan dem ha ka kti jong phi bad hadien ba phi la sliew ia ki, dei ban sait khuid ia la ki jong ki kti da ka sabon. U la ong ruh ba kine ki ngap ka Nairobi ki bam da ki kynja khniang ki ba rit bad ki pynjulor ruh ia ki mar rep. Lada khniot ia kine ki ngap ki pynmih ia ka bih ka ba khlainbor shibun.
Kine ki ngap ka Nairobi ki don ia kita ki kynja bih ba la tip kum ki pederin ki ba wanrah ka jingdait bad jingmong bad jingtyrha lada ki iatyngkhuh ba ka sniehdoh. Namar kane ka jingmong bad tyrha, ia kine ki ngap la ju khot ruh hateng kum ki “dragon bug”.
Kumta ruh la aijingmut ia ki paidbah ba kim dei ban ktah ne ban pyniap da ka kti ia kine ki jait ngap hynrei ban shu sliew ia ki ha ba ki wan ban dem khnang ban lait na kane ka jingma.
