SHILLONG, Jylliew 17: Ka thaiñ Mawsynram hynne ka sngi thohdieng kala duh noh haduh 9 ngut ki mynsiem briew naka jingtwa khyndew kaba la jia ha ki 4 tylli ki jaka kiba la shong synjor na ka jingther jong u slap mynta la palat shitaiew.
Kine ki jaka ki kynthup ha kiba kynthup haka shnong Dangar, Kenmynsaw, Boro Ryngku bad Betgora kiba hap ha Mawsynram Constituency.
Katkum ki khubor kiba la iohlum naki bor pyniaid district kila iathuh ba ka jingtwa khyndew kaba kham shyrkhei eh kala jia ha ka shnong Dangar bad ha kane ka jingjia, haduh 5 ngut ki briew kila iap ba kynthup ia 4 ngut ki Khynnah kynthup I Khunlung ba dang 6 bnai.
Kine kiba iap ki dei kiba la tip kyrteng I Maphishisha Langpen ba 12 snem, i Daskhemlang Langpen ba 5 snem, I Sa-i-dawanbiang Langpen ba 3 snem, u Khunlung ba dang 6 bnai bad ka Kmie jong kine ki Kynnah iba kyrteng I kong Kyllity Langpen ba 32 snem ka rta.
U Kpa jong kane ka Iing uba la tip kyrteng u Shanborlang Marak ula lait im da ka said ha kane ka jingtwa ka khyndew kaba la leit ban tyllep beit beit ia ka Iing ba ki shong ki sah.
Ha ka shnong Kenmynsaw ruh kala don ka jingtwa jong ka khyndew bad kala leit ban ia kawei ka iing bad ha kane ka jingjia 2 ngut kiba dei shi kurim kila khlad. Kine ki shi kurim ki dei kiba la tip kyrteng da u Bah Robino Kynter 56 snem ka rta bad ka Kong Drit Byrsaw 54 snem ka rta.
Katba 3 ngut ki heprit kiba donlang ha katei ka iing, kila lait im kiba kynthup ia ka Ribhalin Byrsaw 13 snem ka rta, Ibawan Byrsaw 8 snem ka rta bad u Keri Byrsaw 7 snem ka rta.
Ha ka shnong Boro Ryngku ruh kala don ka jingtwa khyndew ha kaba ka Sonali Banai kabala don 7 snem ka rta kala khlad noh bad kane ka heprit kaba la khlad noh kadei ka khun jongu Prema Banai bad Devi Banai.
Ha Betgora, A u Nathan Dejel Sangma uba la don 12 snem ka rta u la khlad naka jingtwa jong ka khyndew. U Nathaniel u dei u khun jong u Dopo Sangma bad u Epila Dejel Sangma.
