Nongstoiñ, Nailar 13: Ka jingbym hun jong ki paidbah khappud halor ka soskular pynbeit pud kaba la dep ïasoi hapdeng ka Meghalaya bad Assam, kam dei ban long mawjynthut na ka bynta ka jingpynbeit pud ha ka wat kaba ar ïa ki hynriew tylli kiwei pat ki jaka kiba dang sah, ong ki riew rangbah jong ki shnong kiba don ha ki jaka ki bym pat sdang ka jingïapynbeit kum ka Langpih sector.
Halor kane kajuh ka phang, ki nongïalam jong ka Federation of Khasi Jaiñtia and Garo People, ka la mih shakhmat ban dawa na ka sorkar ba ka dei ban da bishar bniah bha shuwa ban sdang ïa ka jingïakren pynbeit pud.
U bah Serbilin Lyngdoh President ka FKJGP Langpih area unit, u la ong ba u Chairman jong ka Regional Com mittee on Border Dispute, u dei ban khot lang ïa ki nongsynshar hima bad ki rangbah shnong, ha ka por ba ki pyn long ïa ka jingïakren.
U la ong ba ka Committee ka dei ban khot lang shuwa ban sdang ka jingpynbeit ban ïa phylliew jingmut bad ban ïatai sani, khnang ba kan ym pynklumar jingmut ïa ki paitbah nongshong shnong, kumba ka long ha ka jingpynbeit ïa ka wat ba nyngkong, kat haduh ba ki la mih shibun ki jingkynthoh pyrshah ïa ka sorkar bad ïa ki Regional Committee.
U la ong ruh ba ki jaka kiba la dep ïasoi ïa ka soskular pynbeit pud ha ka wat ba nyngkong da ki ar ngut ki Myntri Rangbah, kim dei satia ki jaka kajia pud bad lada peit kat kum ka map ruh dei, tang ka Langpih sector kaba hap ha ka jaka jingiakajia pud. Katba kiwei kiwei kum ka Tarabari, bad Gizang sector pat ki dei tang ki jaka kiba mar khap kiba ka Assam ka la wan kam trai.
Utei u nongïalam ka seng u la ong ruh ba ka jingpynbeit pud ha ka wat kaba ar, kam dei satia ban khynñiat ïa ki shnong kiba hap ha ka Langpih sector sha ka Assam. Hynrei baroh ki shnong kiba don ha katei ka sector ki dei ban shah kynthup ha Meghalaya. U la ong ruh ba wat la ka jingïasoi ïa la soskular pynbeit pud jong ka wat kaba nyngkong ka la dep ruh, kam dei ban don kano kano ka jingpynthut ïa ka jingthmu ban pynbeit ha ka wat ka ba ar, namar lada kan thut noh ka jingpynbeit pud, kan sah kut biang da ki spah snem bad ka jingkyntur pud jong ka Assam kan nang khraw.
Nalor kata lada phai ha ka jinglong jingman jong ki paitbah kiba shong ha ka Langpih sector, na ka liang ki Khasi ki lah ban don katto katne ki ar maloi, namar ki dei kiba la shu pynrung kyrteng thok da ki briew ka sorkar Assam ïa ki katto katne ki riew shim kabu na ka thaiñ kiba la shu leh khlem ka jingtip jong ki trai, tang namar ba ki kwah ban ïoh jingmyntoi ïalade. Hynrei ha kaba ïadei bad katei ka phang ki briew ka aiñ ki dei ban shimkhia bad ban tohkit bniah, khnang ban lait na kino kino ki jingeh hadien habud.
