Shillong, Jylliew 21: U Rangbah ba shah thombor ha ki shipai Border Security Force (BSF) ha ka miet sngi Balang ha Shnong Kuliang, East Jaintia Hills, ula pynshai ba um ju iadon bynta satia ha ka kam khaii mar tuh (shini) sha Bangladesh kumba kynnoh ki BSF.
“Ngam ju don bynta ha ki kam khaii tuh ne ithuh ia ki nong Bangla…Ngam dei u briew ba leh business..Nga im da kaba leit bylla sha khlaw bad ioh tang ka bai nong sngi” ong u Bah Shanroi Lyngdoh Lyngkhoi uba don mynta hapoh ka jingsumar ka Civil Hospital, Khliehriat.
Ki BSF haba pynksan ia ka jingleit thombor ia ka Longiing ka kong Martina Pohshna bad Bah Shanroi Lyngdoh Lyngkhoi, kila pynpaw ba ha ka miet sngi Balang, ki shipai kila kthong ia kumba 30-40 ngut ki nongkhaii Bangladesh kiba wan rung sha Kuliang ban kit ia ka shini sha Bangladesh.
Ki iathuh ba ha kane ka jingkthong, ki paidbah ka Kuliang kila iarap ban pyllait ia kine ki nong Bangladesh da kaba pynibor ia ki shipai haduh bala mih ka jingiania kaba jur. La kynnoh ba ki riew paidbah kila lun maw ia ki shipai bad kawei ka Longkmie kala pom da u side ia uwei u shipai kaba lam sha ka jingmynsaw na ka kti.
Hynrei kat kum ka video bala saphriang paidbah ha ki rynsan social media, la pyni shai ba ki shipai BSF kiba phong jain Iing, kila leit rung ha ka iingsah ka kong Martina bad Bah Shanroi bad kila thom naphang ia ki briew ba don ha kane ka Longiing.
Ha ka video bala ring da uwei u nongshongshnong ka thain, la iohi ruh ba uwei u shipai ula rah ia u side bad don kiba rah da ki lathi. La iohsngew ruh ia ka sur ki kynthei kiba kyrpad ia ki BSF ban sangeh ka thombor wat ka jingpynmih ia ka kyntien ‘Sir’ ne ‘Sahep”.
Kat kum ka ejahar bala mudui da ka Kong Martina Pohshna hapoh ka Umkiang Police Patrolling Post, la kynnoh ba ki shipai BSF kila jrong kti bad leh khlemakor ruh ia ka Khun kynthei jong ka, kaba dang 15 snem ka rta.
Kane ka Longkmie kala kyntu ia ki bor Sorkar bad ka Ain ba kin kem bad ai ka jingpynsajia kaba tyngeh ia kine ki shipai BSF ba donkti.
Lah ban kdew ba ki Pulit kila register case ia kane ka ejahar hapoh ka Khliehriat Women Police Station hapoh ka case no 16(6)2024 bad la pynngat ia kine ki shipai hapoh ka kyndon 457/326/354/506/384/34 IPC pule lang bad ka kyndon 7/8 jong ka POCSO Act.
Ki Pulit ka Umkiang Police Patrolling Post, kila kem ruh ia 3 ngut ki shipai BSF hynnin ka janmiet hynrei hadien kila hap ban pyllait noh namar ka jingwan tur paidbah bad gherao jong ki shipai ha kane ka ktem Pulit.
 ha ka miet sngi Balang ha Shnong Kuliang, East Jaintia Hills, ula pynshai ba um ju iadon bynta satia ha ka kam khaii mar tuh (shini) sha Bangladesh kumba kynnoh ki BSF.){kind=link}