Shillong, Nohprah 05 : U Myntri ba khmih ia ka Legal Metrology Bah Sanbor Shullai ula aipor 60 sngi ia ka Tnad ba kan aiti ia ka kaiphod halor ki jingtreikam jong ka, haba maham ba yn ym ailad shuh ia ka jingbym leh eiei ia kiba pynkhein ain.
“Ngi don aduh 13 ngut ki Inspector ha ka Jylla Meghalaya baroh kawei, kaba duna bha” ong u Bah Shullai hadien ba pyniaid ia ka jingialang bishar kambad ki Ophisar ka Tnad ha ka sngi Thohdieng.
“Ngi la iakren ban nang pynbha ia ka rukom treikam ki nongtrei, bad la bthah ia u Chief Controller bad Director ba kin shong bishar bad ban wanrah sha ka jingialang ban ai jingmynjur” ula ong.
U Myntri ula pynpaw ia ka jingbym sngewtynnad ia ka jingtreikam jong ka Tnad, da kaba kdew ia ka jingbym don ki case ba la iohbat bad ka jingdain kuna ia kiba pynkhein ain naduh ba ioh iala ka jong ka Jylla ha u snem 1972.
“Ka kaiphod ka long kaba sniew bha. Ta ka daw ngi la aipor 60 sngi ia ka Tnad ba kan aiti ia ka kaiphod ba long ba man mynta” ula ong haba bthah ia ki Inspector ba kin leit talasi ia ki petrol pump, weighbridge bad kiwei kiwei ki jaka bad ban aiti ia ka kaiphod hapoh ka 60 sngi.
“Ki dei ban trei hok bad pynlong ia ka jingtalasi ha ka kyrdan jong ki ha ryngkat ka jingiasyllok bad u Controller ka Metrology bad u Director” ong u Bah Sanbor.
U Myntri ula kyntu ia ki paidbah ba kin mudui ia ki jingujor lada ki shem ia kino kino ki jingleh bym hok, haba kular ban leh eiei mardor ia kiba leh tam.
“Ngin iaid ban pynsngewthuh ia ki paidbah ba kane ka Tnad ka treikam na ka bynta jong ki. Ngi kyntu ia ki paidbah ba kim dei ban artatien ha kaban ujor ia kiba leh tam ha ki police station ba marjan lane wat sha nga kum u Myntri bad sha ka Tnad jong nga, ngin sa leh eiei mar mar kat kum ki lynti jong ka ain” ong u Bah Sanbor.
Ka Tnad kala shah pynrem jur namar ka jingbym shim ia ki sienjam ban ai jingiada ia ka hok ki nongthied nongpet, khamtam ia kito kiba wan na ki longiing kiba duna ka jingioh.
U Bah Shullai ula ban jur ba ka kamram ba hakhmat eh jong ka Tnad ka long ban iada ia ka jingmyntoi jong u paidbah.
