Nongpoh, Lber 25 : Ka National People’s Party (NPP) ba synshar ia ka Jylla, kala shu phuh rkhie beit ka durkhmat katba nang iaid ki sngi shajan jong ka elekshon Lok Sabha, namar ka jingiai bteng khlem sangeh kata ka jingwan tuid bad pyniasoh jong ki Nongialam bad ki nongkyrshan na kiwei ki seng sain pyrthei.
Hadien ka jingpra phom ka UDP-Ri-Bhoi, mynta ka sngi pat sa da ki spah ngut ki nongkitkam ka Congress bad UDP kynthup ruh ki nongkyrshan ia ka Voice of the People Party (VPP), kila pyniasoh ialade sha ka NPP hapoh ka Umsning constituency.
Kine ki Nongialam bad ki nongkitkam ka Congress, UDP bad VPP kila rai ban ai ka jingkyrshan ba pura ia ka kyrtong ka NPP ban iakhun ia ka elekshon Lok Sabha-kong Ampareen Lyngdoh, kaba dei ruh ka Myntri ha ka Sorkar MDA-2.
Ia kine ki spah ngut ki Nongialam ka Congress, UDP bad nongkyrshan VPP la pdiang sngewbha sha ka NPP ha ka jingialang kaba long ha Umsning. La pdiang ia ki da ki Nongialam ka NPP ba kynthup ia u Working President ka NPP-EKH bad CEM ka KHADC Bah Pyniaid Sing Syiem, u Nongaiktien ka NPP Bah Himalaya Shangpliang, ka MDC ka Umsning Kong Magdalene S Mawlong, MLA barim Bah Jason S Mawlong bad kiwei kiwei.
Kine kiba wan pyniasoh sha ka NPP ki kynthup ia u Bah Watson Kharkhrang u ba dei u Youth President ka UDP Umsning, u Bah RR Kynsai Makdoh, Adviser ka UDP, Bah Kitdorius Dkhar, President UDP Youth Wing Ri Bhoi District lem 400 ngut ki nongkitkam bad nongkyrsban katba ki nongialam ka Congress ki kynthup ia u Bah Shanbor Lyngdoh, ka Kong Indaker Tariang nalor kiwei kiwei.
Ki Nongialam ka NPP kila pynpaw ia ka jingkyrmen ba kane ka jingwan iasoh jong kine ki nongialam ka UDP, Congress bad nongkyrshan ka VPP, kan dei ka jingai mynsiem bad nang pyniohbor ia ka kyrtong ka NPP Kong Ampareen Lyngdoh ha kane ka elekshon Lok Sabha ban long la 19 tarik Iaiong.
U Bah Pyniaid Sing Syiem, ha ka jingkren jong u, u la ther tyngeh ia kiwei kiwei ki party kiba kynnoh ia ka party NPP ba ka dei ka party kaba bamsap ha kane ka jylla, da kaba ong ruh ba lada ki lah ban pynpaw pyrthei ia kata ka jingbamsap ka NPP, ki dei ban wanrah ia ki sakhi satar hakhmat u paidbah.
“Hato mano na kita ki party kiba la trei ne shakri na ka bynta ka jingbha jingmiat bad ka roi ka par ki paidbah ka jylla Meghalaya, hato ym dei ka NPP kaba la wanrah shibun ki jingkylla, don kawei ka party kaba la hylla ba dei ban pyntreikam ia ka Job Reservation Policy hato kata ka party ka la lah shisha ban wanrah ia ka jingmyntoi ki samla ha ka liang ka ioh kam ioh jam, ngim iohi shisha ia kane, kumta ka long kaba eh ban shu hylla ha surok khlem da tip shai ia ka nongrim”, ong u Bah Pyniaid Singh Syiem.
U la kyntu ia ki paidbah ba kim dei ban shah ialam bakla ha kita ki jingpyrta ieid jaidbynriew da ki party bapher bapher katba kim leh eiei pat ban pynbha ne pynmyntoi ia u paidbah ne ka Ri bad jaidbynriew kumba ki pyrta. Ula khot la wer ia u paidbah ban phai khmat sha ka party NPP ha kane kane ka eleksion MP ban ioh ia ka jingkylla ha baroh ki liang.
