Shillong, March 25: Katba ki sngi kila nang jan sha ka elekshon MP Lok Sabha, ka National People’s Party (NPP) kala nang khlain nang khlain bad nang bun paid ha ka sem da ka jingwan pyniasoh ki nongialam bad nongkitkam na ki seng sain pyrthei bapher.
Da ki spah ngut ki samla jongka Indian National Congress (INC) na Mylliem Constituency kila leit pyniasoh bad ka NPP ha ka jingialang kaba la long ha Indoor Stadium ha Nongkseh hynne ka sngi Nyngkong.
Kitei ki samla kiba wan pyniasoh kidei kiba kyrshan ia u Bah Ronnie V Lyngdoh jongka seng Congress ha ka elekshon MLA kaba la dep. U Bah Ronnie mynta u bat kum u Nongialam ka Liang Pyrshah ha ka iing dorbar thawaiñ ka jylla.
Ki nongialam kiba la wan pyniasoh sha ka NPP, kila pynpaw ia ka jingbym hun ia ka rukom ialam jong u Bah Ronnie V Lyngdoh.
Uwei na ki nongialam ula kynthoh ba u Bah Ronnie Lyngdoh ula ai ki jingkular kiba bun ha ka por elekshon hynrei mynta la shi snem tam naduh ba ula jop ia ka elekshon, ym shim la leh eiei halor kitei ki jingkular kiba ula khlei bad kane kadei ka nongrim ba bun kim don shuh ia ka jingshaniah ia u Bah Ronnie.
Ia kitei ki nongialam jong ka Youth Congress la pdiang sngewbha da ki nongialam ka NPP kiba kynthup ia ki MLA ka NPP u Bah Weiladmiki Shylla bad u Bah Banteidor Lyngdoh, u MLA barim ka Mylliem u Bah Hamlemson Dohling, u Treasurer ka NPP u Bah Daniel M Thangkhiew, u Nongaiktien ka NPP u Bah Himalaya Shangpliang bad ki nongialam ka National People’s Youth Front (NPYF).
Dang ha ka sngi Thohdieng jong ka taiew bala dep, u President ka NPP Meghalaya u Bah Prestone Tynsong, ula pdiang kumba 30- 40 ngut ki nongialam na ka seng United Democratic Party (UDP) na Ri Bhoi District kiba la wan pyniasoh noh bad ka NPP.
Da kane ka jingwan pyniasoh ki nongialam na ki seng saiñ pyrthei bapher bapher bad ka jingpynbna ka BJP ban ai jingkyrshan ia ka NPP ha ka elekshon MP na Shillong bad Tura Constituency kala nang pynkhlain ia ka NPP ha ka jingpynkhreh ia ka jingiakhun ia ka elekshon MP kaban long ha ka 19 tarik u ìaiong mynta u snem.
 kala nang khlain nang khlain bad nang bun paid ha ka sem da ka jingwan pyniasoh ki nongialam bad nongkitkam na ki seng sain pyrthei bapher.){kind=link}