Shillong ,Naiwieng 23: Ka Seng Khasi Seng Kmie hynne ka sngi Palei, kala rakhe iaka Seng Kut Snem kaba 124 bad kane ka jingrakhe kaba shisien shi snem kala long kaba heh bad kaba shongkun bha da ka jingwan iashimbynta da ki hajar ngut ki paidbah.
Ia kane ka jingrakhe dap 124 jong ka Seng Khasi la pynlong ha ryngkat ka nguh ka dem bala sdang na Madan Iewranghep bad hadien kane la pynlong ka jingiaid paidbah shaduh Madan Weiking da ki khun ki hajar.
Hapdeng ka jingiaid paidbah, la sakhi ba ki hajar ngut ki khun ki hajar kiba riam tynrai daki ha rynkat bad ki jingtem tynrai bad ha ryngkat ka rwai ki jingrwai pynneh iaka riti dustur u khun Khasi.
Ha kane ka sngi rakhe dap 124 snem ka Seng Khasi la wan shim bynta lang da u Cjhief Executive Member (CEM) ka Khasi Hills Autonomous District Council (KHADC) u Bah Pyniaid Sing Syiem, u Syiem ka Hima Khyriem u Paiem Balajied Sing Syiem, u Siem ka Hima Hima Mylliem u Paiem Ainam Manik Syiem, u President ka Seng Khasi Kmie u Rgh Oplysor Pyngrope lem bad kiwei ki nongkitkam ka Seng Khasi, ka Kong Matsiewdor War Nongbri nalor kiwei kiwei de.
Ka jingrakhe ia ka Seng Kut Snem ka long kum ka jingkynmaw burom ia ki 16 ngut ki rangbah mynshwa kiba la ïeng ban iada iala ka jong ka Jaidbynriew na ki tyrsim ka jingma jong ka ‘eriong ‘erngit kaba la wan ban beh kyrthep bad sdang ruh ban rah ban rong noh wat ia ki tynrai jong ka Jaidbynriew. Dei ruh ha kane ka sngi ba ka Jaidbynriew ka la sei ia ki rangkynsai ki rangdajied ban iada na ka jingwan tyllep u lyoh ba dum bad dei kine ki rangbah kiba pynkhie im bad pynkyndit bynriew ia u Khasi lyngba ka bor pyrkhat bad jingiohi jngai jong ki ban ialeh pyrshah ia ka jingthombor u nongwei nongar, ban pynduh pyndam ia ka jingngeit niam, ngeit rukom bad riti dustur Khasi.
Ha ka por mynstep la sdang iaka jingiaid kjat na Madan ïewrynghep Laitumkhrah ha kaba da ki hajar ngut ki paidbah kila wan ban iashimbynta da ki hajar ngut ki paidbah bad la nang pyniphuh iphieng da ka jingpyni ia ki tabut ne Tableau kiba la shna ha ki rukom ki bapher bapher kiba iadei bad ka jingngeit tynrai u Khasi.
Ki Rangbah ka seng kila pynlong ia ka duwai ka phirat ha ka iing seng ha Mawkhar bad hadien kane, kila mih ban hiar sha lympung Weiking Jaiaw ban pyndep iaka lehniam lehrukom ban ainguh ia u Blei nongbuh nongthaw.
Haba kren sha ki lad pathai khubor u Assistance General Secretary ka Seng Khasi Sengkmie U Rgh Paia B Synrem ula ong ba kane ka jingrakhe iaka Seng Kut Snem kadei ruh ban ai nguh ia u Blei uba la kyrkhu iaki khun ki hajar lyngba ka jingbha ka kamai ka kajih.
U Rgh Paia B Synrem ula iathuh baka seng ka dap daka jingkmen namar, kala ioh ka jaka kaba heh kumba 6 akar ka jaka ha New Shillong bad kane kan nang iarap iaka seng ban pyniar iaka jingialap haba iadei bad ka jingialeh ban iada bad pynneh iaka jinglong kyrpang ki Khasi.
