Shillong, Nailur 07 : U Chief Justice ka Meghalaya High Court Indra Prasanna Mukerji, u la shongthait noh ha ka 5 tarik u Nailur, hadien ba u la kynjoh ia ka rta ba la ioh ban shongthait.
La pynlong ïa ka ‘Farewell Full Court Reference’ ha Meghalaya High Court ban rakhe ïa kane ka sngi, kaba la iadon lang u Advocate General, Additional Advocate General,, ki nongiasaid ain, ki heh sorkar, bad kiwei kiwei.
Ki nongkren bapher bapher kiba la wan sha kane ka jingïalang ki la pynkynmaw ïa ki jingnoh synñiang jong u Justice IP Mukerj, ha ka jnglong Nongbishar ha ka jylla.
“Ha ka por kum u Nongbishar Rangbah ka Meghalaya High Court, ula pynïaid bad pynmih ïa ki hukum ha ki katto katne ki mukotduma kiba pawnam kum ka mukotduma jong ki nongdie jingdie ha surok, ka jaka thang briew na ka bynta ki jaitbynriew Hindu Khasi & Jaiñtia, ka jingktah ki ksew iaid wir, ka jingpynjot ïa ka mariang haba pyntrei ia ka surok Shillong-Dawki, ka Central Bonded Warehouse bad kiwei kiwei.
Une u nongbishar ula shim ruh ia ka bynta kaba khraw ha kaba pynroi ïa ki jingtei jong ka ïingbishar ha ka jylla,” ong u Registrar General jong ka High Court ha ka kyrwoh ba la pynmih ha ka sngi U Blei.
Da ka jingshongthait noh u Justice Mukerji, ka Ministry of Law and Justice, Department of Justice (Appointments Division), ka sorkar India, ka la thung ïa u Justice Hamarsan Singh Thangkhiew, uba dei u nongbishar jong ka Meghalaya High Court, ban pyndep ïa ki kam jong ka ophis jong u Chief Justice High Court jong ka Meghalaya naduh ka 6 tarik Nailur.
