Shillong , Naiwieng 21: U President ka Meghalaya Dancers Association (AMDA) bah Kitbok Thabah hynne ka sngi nyngkong u la sdang ka jingiakhih marwei da kaba shong kyllaiñ myngor ha khmat ka khyrdop jong ka Secretariat ban dawa ia ka sorkar ba kan ithuh noh ïa ki samla bad ki hep kiba rit kiba don hapoh ka AMDA.
Haba kren sha ki lad pathai khubor u bah Kitbok Thabah u la ong ba kum u nongialam ba hikai shad ïa ki khynnah, ym ju kham wan shong ban rah placard ha Secretariat hynrei tang ha ki por ba shynshar u Dr. Mukul Sangma bad mynta ba shynshar u Conrad Sangma, u la hap mih madan ban dawa ban ioh jingithuh ym tang iaka AMDA hynrei naka bynta baroh ki samla bad khynnah don sap.
U bah Kitbok u la ong ba ki mat jingdawa ba ka AMDA kala buh ha khmat ka sorkar kadei naduh u snem 2019 ban ioh jingiarap bad ban ioh jingithuh iaka seng hynrei haduh mynta kine baroh ki khlem la seisoh namar ka jingleh mynthi ka sorkar jylla.
U la ong ba ka jingwan mih madan jong u mynta ka sngi kadei ban dawa ïa ka sorkar MDA ka dei ban ai noh da ka song pisa ba kyrpang ïa ki samla nongshad bad ki samla nongrwai ne kata ka Finance Assistant bad ban wanrah ïa ka jaka ai jing pyntbit ïa ki samla donsap ne ka (Institute).
“Ka seng AMDA kala jam 22 tylli ki snem hynrei haduh mynta ym pat don kano kano ka jingiarap na ka sorkar ne wat na ki nongmih khmat, namar la katta ki snem ka seng AMDA kala iaid lynti bun ki khynnah kiba la wanrah ïa ka nam ha ka jylla haba ki wan ïa khun ïa ki sap bapher bapher ha ki International bad National Level” ong u bah Kitbok.
U bah Kitbok u la ong ruh ym tang ki samla kiba wan na iing kiba ioh ba kot hynrei bun ki samla khynthei bad shynrang ki wan na ka longiing long sem kaba duna ka jingioh hynrei ki thrang ban leit ïa shimbynta ha ki rynsan bapher bapher hynrei ki kmie ki kpa kim lah ban kyrshan namar ka jingduk.
