Shillong, Naitung 21 : U Myntri Rangbah Conrad K Sangma ha ka sngi Ba-ar, ula shong bishar ia ka jingiaid ki project Meghalaya House ba dang pyntrei bad ba dang tyrwa ha kylleng ki Sorbah ka Ri, haba ban jur ban pyndep hapoh ka por kaba la buh, ka jingpyniaid bha bad ka jingpynbiang ia ki jingdonkam baroh.
Na ka bynta ki hajar ngut ki nongshongshnong ka Meghalaya kiba leit shabar ka Jylla ban pule, leit sumar jingpang bad leit pyndep kam, ka Meghalaya House barabor ka dei ka jaka kaba long kum ka Iingsah jong ki, kaba don shabar ka Jylla.
Ia kane ka jingialang bishar kam la pyniaid lyngba ka durkhih (virtual) bad u Myntri ba dei khmih ia ka Tnad General Administration Department (GAD) bad ki Heh Ophisar ka Tnad
Ka jingialang kala bishar bniah ia kaei kaba long ba man jong ki jingtei kiba dang iaid bad ki jingtei pynheh, ka jingpyntrei ia ki Meghalaya House ba thymmai bad ka jingtreikam jong ki jingtei kiba la don lypa. Ka jingialang kala iakren shaphang ki project ha Delhi, Noida, Mumbai, Bengaluru, Vellore bad Kolkata, haba pynleit jingmut ia ka jingpynbha ia ki jingtei, ka jingai jingshakri bad ka rukom pyniaid kaba thikna.
U Myntri Rangbah ula bishar ia ka jingiaid ki kam jong kawei pa kaweika project, khmih bniah ia ka por bala buh ban pyn trei ia ki kam, bad bthah ia ki Ophisar ba kin pynthikna ba kin pyntrei ha ka pork aba biang haba pynneh ruh ia ka jingtrei bha ia ka kam. Ula ban jur ia ka jingdonkam ka rukom pyrkhat (planning) kaba paka khnang ba kine ki jingtei kin lah ban pynbiang ia ka jingdonkam ba nang bun jong ki nongshongshnong ka Meghalaya kiba leit shabar ka Jylla.
Ha kane ka jingialang, ka jingiakren kala long eh halor ka jingpynkhlain ia ka rukom pyniaid bad jingtreikam jong ki Meghalaya House khnang ban pynthikna ia ka jingshakri ba kham bha na ka bynta ki samla pule, ki nongpang kiba leit wad jingsumar, ki nongtrei ka Sorkar bad kiwei kiwei ki nongshongshnong.
U Myntri Rangbah ula ban jur ia ka jingkongsan ban pynneh ia kine ki jingtei kum ki jingtei kiba pdiang bad ba pyniaid bha, kiba shakri kum ki Iing ba shabar ka Jylla na ka bynta ki nongshongshnong ka Meghalaya.
Ula bthat ruh ia ka Tnad ba kan iai bteng ban peitthuh bha ia ka rukom pyntreikam ia ki project bad ban pyntrei kloi ia ki kam ba dang sah khnang ba kine ki jingtei bala tyrwa, kin lah ban dep noh hapoh ka por kaba la buh.
Kane ka jingbishar kam ka pyni ia ka jingkut jingmut ba khlem sangeh jong ka Sorkar ban pynheh bad pynlong ia ki Meghalaya kum ki jingtei ka juk ha baroh ki Sorbah ka Ri, kaban pynthikna ia ka jingsuk, jinglah ban ioh bad jingshakri ban kyrshan na ka bynta ki briew jong ka Jylla haba ki leit jingleit shabar ka Jylla.
