Shillong, Risaw 26 : U Symbud Myntri Rangbah ka Jylla ba khmih ia ka Tnad Home (Police) Bah Prestone Tynsong, ha ka sngi Palei, ula lum ia ka jingialang shong bishar kam halor ki jingjia pluh ding kiba jia hapoh ka Jylla.
Haba iakren bad ki nongthoh khubor, u Bah Prestone ula ong “Ngi la shim ia katto katne ki rai ha kaba nga la bthah ruh ia ka tnad ba dei khmih, ia u Inspector General (IG) ba dei khmih, ba kin aiti lut ia baroh ki jingtip ba bniah, kiei ki jingeh ba ki iakynduh la ka dei ha ki tiar ki tar lane ki briew. Nga la bthah ia u (IG) ban aiti sha ka Sorkar bad ngin sa peit kawei hadien kawei ia baroh kine ki jingdonkam kham kloi kat kaba lah” ong u Bah Prestone.
Ia kane ka jingialang la pynlong halor ka jingiohi ia ki jingeh ha ka jingiakhun ia ka jingpluh ding ba dang shen ha Police Bazaar.
Halor ka fire safety audit ia ki Iing ki sem bad ki jingtei, u Symbud Myntri Rangbah ula ong “Kane ruh ka dei shibynta jong ka jingiakren ha ka jingialang. Ta ka daw nga iathuh ia phi ba nga la dep bthah ia ka Fire Service wing ba kin aiti ia baroh ki jingtip kaba mut ki jingai jingmut sha ka Sorkar bad hadien ba ngi ioh pdiang ia kane, ngan sa khot biang ia ka jingialang”.
Halor ka jingkylli, u Bah Prestone ula ong “Ngan sa khot biang ia ka jingialang halor kane kakam. Ngin sa iakren ha ki kyrdan ba halor halor ka jingdonkam ban wanrah ia ka fire safety policy bad ki SOP khamtam ha ki jaka sor kaba nga sngew b aka dei kaba donkam kyrkieh bha”.
