Shillong, Nailar 23 : Ka Committee on Women Empowerment jong ka ïingdorbar thawaiñ ka jylla kala shong bishar kam halor ki jingjia kiba iadei bad ki jingshah thombor ki longkmie bad ki khynnah kynthei ha East Jaiñtia Hills bad West Jaiñtia Hills Districts ha ka 21 bad 22 tarik mynta u bnai.
Ka Chairperson jongka Committee, ka Kong Santa Mary Shylla, kala lum ia katei ka jingialang bishar kam ha kaba la iadonlang ki dkhot kiba dei ki MLA kiba kynthup ia ka Miani D Shira, Bah Adelbert Nongrum, Bah Gabriel Wahlang MLA, u Marthon J. Sangma MLA bad u Bah Mathew B. Kurbah.
Haba iakren bad ki nongthoh khubor, ka Chairperson ka Committee kala ban jur ba dei ban ai ia ka jingbishar kaba hok bad kaba kloi khamtam eh ha kaba iadei bad ki POCSO Case.
Kala ong, ba kala bthah ia ki bor pyniaid distrik ba ki dei ban pynthikna ba dei ban pynbiang ia ki jingdonkam baroh ia ki lanot.
Ka Kong Shylla kala ong ba ka Committee kan sa iai buddien halor kitei ki jingjia bad kan sa pynlong ruh ia kum kitei ki jingialang ha kiwei pat ki district jong ka jylla.
Ia ka jingialang ha ka East Jaintia Hills la pynlong ha DC office, Khliehriat ha kaba u Deputy Commissioner ka East Jaintia Hills uAbhilash Baranwal, u Addl. SP ka East Jaintia Hills bah Banraplang Jyrwa, bad kiwei kiwei ki heh ophisar kila wanba niashimbynta haka jingialang.
Ia ka jingialang ha West Jaintia Hills la pynlong ha Jowai ha kaba u Deputy Commissioner ka West Jaintia Hills u Bah BS Sohliya, u SP ka WJH Bah Chemphang Syrti, u Dy SP Bah CW Lyngdoh bad kiwei kiwei ki heh ophisar kila wan iashimbynta haka jingialang.
Ka Committee kala leit ruh ban jurip iaka One Stop Centre kaba don ha Khliehriat ha ka Lah Sngi U Blei.
Pule ruh: Pynkhreh ka Sorkar ban shim rai halor ka jingseng ia 3 tylli ki Medical College ha Jylla
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
