Shillong, Nailur 03 : U Myntri kam jngohkai ka Ri Gajendra Singh Shekhawat, ula iaroh ia ka jingi tynnad ka kolshor bad ka mei mariang jong ka Jylla Meghalaya haba wer ia baroh ban ‘Wan iuhkjat ha Meghalaya”.
U Shekhewat ula pynpaw ia kane haba leit jngoh ia ka South West Khasi Hills hynne ka sngi Ba-ar bad iai ban ba ka lad ban kyntiew bun eh ia ka kam jngohkai hapoh ka Ri ka dei ha ki Jylla jong ka thain Shatei Lam Mihngi khamtam ka Jylla Meghalaya.
Ula kyntu ia baroh ban wan iuhkjat ha Meghalaya bad ong “Ka Meghalaya ka don ia ki lad ki lynti ban kiew bha ha ka kam jngohkai hapoh ka Ri. Ale ngin ia leit iuhkjat bad mad lem ia ka Meghalaya; ka riti dustur jong ka bad ka jingitynnad ka mei mariang”.
Ha kane ka jingleit jngoh, u Myntri ka Sorkar India ula leit ban iuhkjat ha kylleng ki jaka jngohkai ba kynthup ia ka Umshit (hotspring) ha shnong Jakrem, Synrang Mawrin ha shnong Mawten, Mawkyrduk Monolith (Tyndong) ha Mawlangwir bad ka Mawranglang viewpoint ha Mawranglang.
La pyninam ia u Myntri da ki jingrwai bad jingshad nala tynrai ha kine ki jaka jngohkai kynthup ka jingrwai na Ki Sur ki Nongkyndong bad ka jingshad tynrai n aka Ri-Maram Folk Academy ka Mawlangwir.
U Shri Shekhawat u la pynpaw ïa ka bynta ba kongsan kaba ka kam jngohkai pyrthei kan leh ha ka jingïaid lynti jong ka India ban long ka Ri kaba kiew shaphrang ha u snem 2047.
U la ong, “Baroh ngi tip ba ka Ri ba-ieid jong ngi hapoh ka jingïalam jong u Myntri Rangbah duh ka ri, kala iaid shakhamt ban long ka Ri kaba la kiew shaphrang hapoh u 2047. Ka Ri India ka dei kaba la ithuh kum kawei na ki ri kaba kiew stet tam ha ka pyrthei ha ka ioh ka kot bad ka don ia ka lad ban kyntiew ia ka kam jngohkai man la ka sngi.”
U la kubur ba ka lad kaba bun eh ban kyntiew ia ka kam jngohkai hapoh ka Ri ka don ha ki Jylla ka thain Shatei Lam Mihngi khamtam ka jylla Meghalaya. Baroh. ki jylla jong ka thain Shatei Lam Mihngi ki long kiba la kyrkhu da ka jingriewspah ha ka kolshor bad ka jingitynnad jong ka mei mariang, u la bynrap.
Ha kane ka sngi, u Myntri ula pdiang ruh ia shibun ki dorkhas kiba la ai da u MLA ka thain Bah Renikton Lyngdoh Tongkhar, ka Dorbar Shnong Mawten, u Principal ka Sngap Syiem College, Mawkyrwat, u Rangbah Shnong ka Shnong Mawlangwir bad kiwei kiwei.
U Myntri ula pynpaw ba un pyrshang katba lah ban leh eiei kham kloi kat kaba lah ia ki jingdonkam jong ki paidbah ka thain bad ong “Ka Sorkar India hapoh ka jingialam u Myntri Rangbah Duh Narendra Modi kala kut jingmut ban pynroi ia ki Jylla ka thain Shatei Lam Mihngi bad ki kam jngoh kai ha kine ki Jylla kiba itynnad”.
Ha kane ka sngi, u Myntri ula pyniaid ruh ia ka jingialang bishar kam halor ka jingtreikam jong ki skhim kam jngohkai hapoh ka District. U pyntip ula pan jingtip ruh halor ka jingwan ki nongshang kai pyrthei, ka jingtreikam ki homestay nalor ka jingbishar kam halor ki skhim MGNREGS, PMAAGY, PMEGP bad kiwei kiwei.
