Shillong, Naiwieng 02 : U Myntri ka DoNER Jyotiraditya Scindia ula pynpaw ia ka jingshoh biej haba iohi ia ki Jingkieng Diengjri ka Meghalaya bad ong ba “dei ka jingiohipat ia ka mynnor” bad ka dak ka jingiajan hapdeng ki briew bad ka mariang kaba hap ban tyngkai bad iada.
U Scindia ha ka sngi Saitjain, ula leit jngoh ia kawei na ki Jingkieng Diengjri ba jrongtam ha ka shnong Rangthylliang kaba don marjan ka East Khasi Hills District bad hangne ula iakren bad ki trai shnong lem bad ki riewtynmen ka Shnong kiba la iada bad pynneh pynsah ia kine ki jingshna ba phylla jong ka mariang kiba la neh da ki spah snem.
U Scindia ha ryngkat ki kynhun iada ia ki Jingkieng Diengjri lem bad u guide Morningstar Khongthaw, nalor kiwei kiwei, kila pynlut katto katne por halor jong kine ki jingkieng Diengjri, kiba jrong da ki spah phut na madan.
“Haba phi wan shane, ka ialam biang ïa phi ban ïohi ia ka por jong ka mynnor, ka jingitynnad bad jingsuk jong ka Mei Mariang, ka jingstad jong ka katba ka dang khum ïa ki kti jong ka sawdong ka pyrthei bad ka ai ka lynti ïa ngi ki briew ban ïakynduh bad pynïasoh,” ong u Scindia ha ka video kaba u la pynmih ha ka Instagram ha ka Sngi U Blei.
U la batai ia ki Jingkieng ba shna n aka mariang kum ka jingpynpaw ia ka jingiadei kaba jylliew hapdeng ki briew bad ka mariang jong ki, da kaba ong, “Ka jingitynnad jong ka Mei Mariang, ka long kaei kaei kaba ngi, kum ki briew, kum ki nong India bad kum ki briew jong ka Meghalaya ngi dei ban niew kor bad mane namar ba ka long ka nongiada bad nongpynbiang ia ngi.”
Haba niew ia ka jingleit jong u kum “ka jingshem kaba sngewtynnad”, u Myntri u la ong ba u sngewrit ban don “ha ka pneh jong ka khyndew ka Meghalaya bad ki tynrai kiba la kha ia ki pateng jong ki briew kiba iajan bad ka mariang.”
U Scindia u la iaroh ruh ia ki jingnoh synniang jong ka Living Roots Foundation, ba la ialam da u Morningstar Khongthaw, kaba ka kam jong ka ka long ban pynneh pynsah, ban iada, bad ban ai pateng ia ka jingnang jingstad tynrai haba iadei bad ka jingshna ia ki jingkieng Diengjri sha ki pateng ban wan jong ki jaitbynriew riewlum kiba shong basah harud ki lum ba shathie jong ka Ri Khasi.
U Bah Khongthaw, uba la ïakren bad u Scindia ha katei ka jingleit jngoh, u la ong, “Nga sngewkmen ba nga la ïoh ïa ka lad ban ïakren markhmat bad u Myntri ka Sorkar Pdeng ba khmih ia ka DoNER. Nga la kyntu ïa ka Sorkar Pdeng lyngba u Myntri ban pynpaw pyrthei ïa kine ki jingshna ba phylla jong ka Meghalaya. Ngi donkam ban pynneh pynsah ïa ki jingkieng.”
U Scindia ula wan sha Meghalaya kum shibynta na ka jingwan iuhkjat ba arsngi ha kaba ula leit buh ia u maw nongrim ban tei ia ka project Sohra Circuit ba T.233 klur hapoh ka Prime Minister’s Development Initiative for North East Region (PM-DevINE) scheme ha ka sngi Saitjain.
Kane ka project ka thmu ban pynkhlain ia ki jingtei jong ki kam jngohkai bad ban ai ka lad kamai jakpoh ka ban neh shirta ha Sohra.
Lah ban kdew ba dang ha ki khyndiat bnai bala leit, ka Myntri Pla tyngka ka Ri Nirmala Sitharaman ruh kala leit ban jurip ia ki Jingkieng Diengjri ha ka thain Dohra bad iaroh ia ka jingstad jong ki trai shnong ban shna ia ki jingkieng bad ruh ka jingtrei shitrhem jong ki Shnong ban iada ia ka spah mariang bala ai pateng ha Meghalaya.
