Shillong, Lber 28: Ki pulit ka East Khasi Hills kila shim da ka suo-motu case pyrshah ia uwei u riewshimet uba la kam ialade kum u ophisar pulit bad donkti ha kaban thombor ia uwei u nongniah kali.
Hadien ba ka video kala saphriang ia ka jingshah shoh u nongniah kali ha uwei u briew uba la kam ialade kum u ophisar pulit, kala pynlong ia kiba bun ban bitar lep ia kane ka jingthombor une u briew.
Ha ka video, la iohi ba une u briew ula byrngem ia u nongniah kali ban siat da ka pistol ha ryngkat bad ka thombor ia une u nongniah kali da kaba kura bad thap ia u. Nalor kane ula byrngem ruh ia u nongniah kali ban thep hapoh phatok ryngkat bad ka ak kum u heh pulit uba dang trei ia la ka kamram.
Watla ka daw kaba pynmih ia katei ka jingjia kam long kaba shai kdar, hynrei kumba paw ha ka video ka pyni ia ka jingleh donbor bad ia ka jingthombor jong une u riewshimet ia u nongniah kali.
Haba pynshai halor kane, u Superintendent of Police East Khasi Hills Police, u Bah Vivek Syiem, ula pynthikna ba une u briew uba mih ha ka video um dei satia u ophisar pulit hynrei udei u riewpaidbah.
“Hadien ka jingsphriang jong ka video ha ki rynsan social media, ba pyni ba uwei u briew ula shoh la dat bad byrngem ia u nongniah kali bad khamtam haba bun kila kynnoh ba une u briew udei u pulit, ngi la pynlong ia ka jingtohkit bad la shem ba une u briew um dei satia u pulit hynrei u dei u riewpaidbah” ula pynpaw.
Ki bor kiba dei khmih kila pyntip ba kila shim da ka suo-motu case ia kane ka jingjia bad ban leh da kaba tyngeh pyrshah ia une u briew katkum ki kyndon aiñ.
Ki pulit ka East Khasi Hills kila pynpaw ba ki iengskhem ha ka nongrim ban batskhem ia ka aiñ bad ban pynthikna ban ai jingiada ia ki nongshong shnong bad ruh ban don ia ka akor ka burom hapoh jong ka tnad pulit.
