Shillong Risaw 26: Ka Hynniewtrep Youth Council (HYC) West Khasi Hills hynne ka sngi Palei, kala dawa na u Chief Executive Member (CEM) ka KHADC ba ka Council ka dei ban tei noh ia u Motdur ba shi rynnieng jong u Nongialam ba radbah ka jylla (L) Bah Hoping Stone Lyngdoh namar mynta la palat 3 snem ka Council kam shym la pyndep satia iala ka jingkular ban tei ia une u motdur.
Katei ka jingdawa ka HYC-WKH kala mih hynne ka sngi palei, ha kaba ki nongialam ka seng kila ai da ka dorkhas ia u CEM ka KHADC bah Pyniaid Sing Syiem.
Haba iakren bad ki nongpathai khubor u President ka HYC-WKH u Bah Lumlang Kharsyiemlieh ula ong ba ha ki snem kiba la dep, u CEM barim ka KHADC haba u wan iahsimbynta ha ka lyngkhuh sngi ïap jong u Bah Hoping Stone Lyngdoh, ula kular ban shna ia u motdur ba shi rynieng jong u Maieid Hoping ha Nongstoin namar ba ia ka ophis KHADC hapoh Nongstoin kadei kaba la pynioh da une u radbah uba long kum u MDC haduh 36 snem bad kum u CEM naduh u snem 1984-1989.
U Bah Lumlang ula ong ba u CEM barim ka KHADC u bah PN Syiem, ula kular hakhmat jong ngi bad hakhmat jong ki paidbah ban shna ia u mot ba shi rynnieng hynrei haduh mynta la 3 ne 4 snem kim shym la lah ban pynurlong ia katei ka jingkular.
Ka seng kala dawa ba ka KHADC kadei ban tei ia u motdur kum ka dak ban kynmaw burom ia u nongialam uba la iakhun ban pynioh ia la ka jong ka jylla.
