Shillong, Lber 19: Palat 1391 tylli ki pung pyllang um la tei ha palat 3000 hektar ka jaka ha kylleng ka Jylla Meghalaya hapoh ka Projek New Generation Watershed Development Project ka WDC-PMKSY 2.0.
Ia kane la pyntip da ka Myntri ka tnat ka rep ka riang Kong Ampareen Lyngdoh haba ai jingkren ha ka Watershed Yatra Awareness cum sale of products jong ki Self Help Group (SHGs) ba la pynlong da ka Meghalaya State Watershed & Wasteland Development Agency hapoh ka Directorate of Soil & Meghalaya State Conservation ha State Central Library.
Ka Kong Ampareen kala pyntip ba ym duna ia ka 1200 tylli ki SHG kila don bynta ban pyntreikam iaka WDC-PMKSY 2.0 hapoh ka Jylla.
“Kane ka jingbei tyngka ha ka jingïashim bynta jong ki paidbah ka la ai ïa u soh uba bha. Mynta ngi la lah ban pyndonkam biang ïa ki jaka ba shu ieh shrah, pynbha ïa ka jinglong ka khyndew, nang pynsboh ia ka khyndew khnang ba ki nongrep kin ïoh nang kyntiew ia ka kam rep kaba lah ban pynim ja ia ki” ka la ong da kaba bynrap “Ngi la shna 1391 ki jaka pyllang um haka jaka ba heh kumba 3000 hektar bad kane kan long ka lad jingim na ka bynta kiba ïakynduh ïa ka jingduna um kaba jur ha ka por ba duna um.”
Haba kdew ia ka jingkylla ka suiñbneng ba mynta, ka jingpom pathar ïa ki khlaw ki btap, ka jingpynjot ïa ka khyndew, ka jingkylla sor bad ka jingjaboh ka long ka jingma kaba khraw tam ïa ka jingïoh um, ka Myntri ka la ong ba kine ki jingjia kim dei tang kiba pynlong ïa ka jingduna um hynrei ki ktah ruh ïa ka jinglong ka um kaba wanrah ïa ki jingma ïa ka koit ka khiah bad ka jingduhnong ha ka rep ka riang.
“Ka jinglong jingman ka nang kham sniew shuh shuh namar ba 17 percent ka khyndew jong ka Meghalaya ka la shah pynsniew katkum ka kaiphod jong ka Indian Wasteland Atlas. Ka jingpynsniew ia ka khyndew ka pynduna ia ka jinglah ban bat ia ka um kaba ktah beit beit ia ka rep ka riang bad ka jingpyndap um biang ia ki jaka pyllang um,” ka la bynrap.
Ka Myntri kala kdew ruh ba ka Jylla ka ïakynduh ïa ki jingpang jong ki jait jingthung kiba don ïa ki jingma bad kala ong “Dang shen ngi la ïakren ïa ka jingpang ki dieng kwai (budd rot) ha ka ïing dorbar thawaiñ da kaba pyrshang ban ïakren bad ki MLA na ki 60 tylli ki constituency ban ïatreilang bad ki khnang ba kin lah ban kyntiew ïa kane ka jait kam kaba kongsan”.
Ka Myntri kala ban jur halor ka jingdonkam ban pynim bad pynneh iaki tyllong um naka bynta ka jingmyntoi jong baroh.
Kala pyntip ba kane ka watershed yatra ka dei ka dak jong ka jingkular jong ka Sorkar ban poi sha man la ki district jong ka Jylla.
