Shillong, Nailar 29 : U Nongai buit ka Farmer Cell jong ka East Khasi Hills Bah Kansing Lyngshiang hynne ka sngi u la leit ban pynshai sha ki nongrep jong ka Mawkynrew constituency ba dei lyngba ka jingtrei borbah jong ka Farmer Cell ba ka sorkar jylla hapoh ka jingialam jong u Conrad Sangma kum u Myntri Rangbah bad Bah Prestone Tynsong kum u Symbud Myntri Rangbah ki la rai ban pynpoi pahuh biang ia ka dawai sboh na ka bynta ki nongrep.
Utei u rangbah haba kren ha ka jingialang kaba la poi bun bha ki nongrep na kylleng ki shnong jong ka constituency u la ong ruh ba ki paidbah kidei ban tip iano ban ai burom halor katei ka rai ba ka sorkar ka kular ha ki nongialam jong ka Cell ha ka jingleit jong ki dang shen markhmat ha Secretariat.
“Wat shah ialam bakla bad phim dei ban ai burom ia ki bym dei,” u la ong da kaba ban biang ba ia katei ka jingeh ba ki nongrep ki kynduh namar ka jingkiew dor ka dawai sboh kadei kaba la ktah haduh katta katta ia ki hadien ba ka sorkar ba rim ka la khang noh ban pyndonkam ia ki.
Nalorkata, u ong ruh ba ka jingwan jong u ban pynshai paidbah kadei namar ban pyni ba da ka jingiatrei lang ryngkat ryngkat bad ki nongrep mynta kawei shwa ka bynta ki la jop bad kaba sah mynta ka long ban ia kren pat sa ia ka dor kaba ki nongrep kin im lang.
Shuh shuh u ong ba baroh shi katta, ki nongrep bapli nalor ba ki hap thied da ka dor kaba rem ia ka dawai sboh hynrei ki mar rep ynda la die pat ka dei ha ka dor kaba tad. Kumta, u ong ba ka jingioh ia ka subsidy ba shiteng dor kan long ka jingkyrkhu kaba khraw ia ki nongrep katei ka thain.
