Shillong, Nailur 17 : U MLA ka BJP na South Shillong Bah Sanbor Shullai ha ka sngi Balang, ula leit shimti ia ka shuki kum u Myntri ba khmih ia ka Tnad Animal Husbandry & Veterinary, Arts & Culture, Printing & Stationary bad Legal Metrology.
U Bah Sanbor ula ai ruh ka jingiaroh ia u Myntri Rangbah Conrad K Sangma bad ia ki Nongialam ka BJP namar ka jingbat ne burom ia ka jingiateh kular bala iasoi ha ka por ba thaw ia ka Sorkar MDA-2.
Haba kren sha ki lad pathai khubor, u Bah Shullai ula iathuh ba ka BJP kala iasoi ia ka soskular bad ka Sorkar MDA ba ialam da ka NPP, kaba ong ba u Bah AL Hek un shakri kum u Myntri ha ka bynta ba nyngkong jong ka arsnem shiteng bad hadien yn sa shimti sa u Bah Shullai ia ka bynta ba arsnem shiteng ban pynkut ia ka samoi.
Kat kum ka jingong jong u, ia ka soskular la iasoi ha ka jingiadonlang u President barim ka BJP Bah Ernest Mawrie.
“Ia ka jingiateh kular la burom da u Myntri Rangbah Conrad K Sangma bad ki Nongialam ka Party” ong u Bah Shullai.
Haba kylli la u kmen halor ka jingbate kam, u Bah Shullai ula ong ba ka jingbate kam kam da kongsan eh ha u. “Ha nga, ki tnad ba ai kim da don jingmut. Ha nga, lada phi ai tang ka Tnad Fisheries ruh nga Kmen” ula ong haba pynpaw ia ka jingkut jingmut ban shakri ia ki paidbah bad ban pyndonkam ia ka samoi treikam jong u na ka bynta ka jingmyntoi ka constituency bad ka Jylla.
