Shillong, Naitung 05 : U Bah Deimaia L Siangshai, Editor ka kot khubor Mawphor, ula shah jied kum u President ba thymmai jong ka Shillong Press Club (SPC).
Ka Shillong Press Club, kala lah ban pynlong ia ka elekshon jied nongkitkam ba thymmai hynne ka sngi Thohdieng ka 5 tarik Naitung, kaba la wan ulong hadien 14 snem.
Kane ka elekshon kaba la pynlong da ka Directorate of Information & Public Relation, kala sakhi ia ka jingiashimbynta ba shitrhem jong ki nongthoh khubor kiba la wan na kylleng ki District ka Jylla.
Ia kane ka elekshon la pynlong na ka bynta ban jied ia u President, u General Secretary bad u Treasurer ba thymmai jong ka Club. Haduh 164 ngut ki nongthoh khubor kila iashimbynta ha ka jingiathep vote.
Na ka bynta ka kam President, u Bah Deimaia L Siangshai, Editor ka kot khubor Mawphor, ula ioh ia ka jingjop da ka jingioh haduh 91 vote. U Bah Joe Thangkhiew jong ka Batesi TV ula wan ba-ar da 67 vote bad u Bah Raphael Warjri jong ka Media Plus, ula ioh 6 vote.
U Bah Dominic Savio Diengdoh, trai jong ka T7 News, ula jop kum u General Secretary khlem ki nongialeh pyrshah.
Katba ia ka kam Treasurer, u Bah Greshome Hat, Editor ka kot khubor U Peitngor, ula jop da 113 vote katba u Bah Martin Nongkhlaw ula ioh 50 vote.
