Shillong, Lber 04: Ka North-Eastern Hill University Teachers’ Association (NEHUTA) kala pynrem jur ia ka jingkam u Vice-Chancellor Prof P.S Shuklaba ula shimti biang ia ka kam kum u VC watla um pat wan trei hadien bun bnai ba u shim Earned Leave.
U Prof Lakhon Kma, President ka NEHUTA bad Dr Marbhador M Khymdeit, General Secretary ka NEHUTA, kila pynpaw ia ka jingsngewkhia ia ka jingkam jong u Prof Shuka ka bym pat ju jia mynno mynno ruh, da kaba ong ba ha ka histori ba 50 snem ka NEHU, um pat ju don mano mano ruh ban shimti ia ka kam da ka dur khih (virtually) haba dang pep ban wan sha ka headquarter jong ka University ha Shillong.
Ka NEHUTA kala kynnoh ba u Prof Shukla ula pynkhein ia ka NEHU Act, Statued bad Ordinance da kaba pynpaw ba ula shimti biang ia kam katba u dang leit jingleit.
Kane ka kynrum kynram kala nang jur da ka jingtohkit kaba dang iaid halor ki jingkynnoh ia ki jingleh bakla jong u Prof Shukla.
Ka NEHUTA kala kdew ba ka jingshem jong ka jingtohkit ka dei ka ban dang pynmih paidbah bad la bthah ia u ba un shim da ka shuti tad haduh bala pyndep ia ka kam.
Kane ka synjuk ki Nonghikai kala buh jingkylli ba kumno u lah ban kam ba ula wan phai sha ka Ophis haba um pat wan shimti mar met ia ka kam.
Ka NEHUTA ka kynthoh ia ka jinglong jingman kum ka jingshet kylla ia ka rukom treikam jong ka University bad ka jingbteng ïa kaei kaba ki batai kum ka por treikam kaba pynjot jong u Prof. Shukla.
Ka synjuk ka ong ba ki rukom pyniaid kam ba bakla jong u ha ki por bala leit kala wanrah ia ka NEHU sha ka kyrdan ba shatrai eh bad kane ka sienjam ba mynta kan nang wanrah shuh shuh ia ka jingkulmar bad ki kynrum kynram ba jur.
Lah ban kdew hangne u Vice Chancellor Prof PS Shukla ula shim shuti naduh ka 15 tarik Naiwieng namar ka jingiakhih jong ki samla pule.
Ha ka shithi pan shuti, ula kdew ia ki daw bym lah kiar, ba ula shim ia ka earned leave naduh ka 15 tatik Naiwieng bad la pynbud biang da ka shuti naduh ka 17 tarik Naiwieng haduh ka 29 tarik Naiwieng haba pynpaw ruh ba u lah ban pynjlan ia ka shuti lada donkam.
Ia kam Acting Vice Chancellor la shimti noh da u Professor ba rangbah tam ka skulbah Nirmalendu Saha ban pyniaid ia kane ka skulbah.
 kala pynrem jur ia ka jingkam u Vice-Chancellor Prof P.S Shuklaba ula shimti biang ia ka kam kum u VC watla um pat wan trei hadien bun bnai ba u shim Earned Leave.){kind=link}