SHILLONG, JUNE 28: U Myntri Rangbah ka jylla u Conrad K Sangma ula pyntip ba dang shen ula shimkhia ban leit iakren ia ki mat bapher bapher bad ka Sorkar Pdeng bad leitiakynduh ia ki Myntri Sorkar ha ka jingleit Delhi.
Haba iakren bad ki nongthoh khubor, u Conrad ula pyntip ba ula pynsngew ha u Myntri ka DoNER ha kaba iadei bad ki projek bapher kiba dang sahteng bad ka Ministry bad ula kyrpad ba ka long kaba donkam ban khmih biang ia ki kyndon treikam.
“Nga dap da ka jingsngewkmen ban pyntip ba u Myntri Sorkar ula ai ka jingkular ba baroh ki projek kiba sahteng kiba don ha ka Ministry yn sa pyllait noh kham kloi” ula ong bad ka bynrap “Ha ka juh ka por, nga lah kyrpad ia u, ba iaki kyndon treikam kiba la don lypa dei ha ka tnad DONER ki long kiba kyllain bad kumta dei ban pynbeit ryntih noh namar ki don ki projek kiba suk, kila shim por da ki snem shiteng ban poi sha ka kyrdan ban ioh ia ka jingmynjur, kumta lada pynsuk noh iaki kyndon treikam kan iarap shibun ha kaban ioh kham kloi ia ka jingmyjur bad ban lah ban pyntreikam noh mardor. Kumta nga la kyrpad bad kyntu ban pynbeit thymmai noh ia ki kyndon treikam bad kumta u Myntri ula pynthikna ia nga b aula sdang ban khmih bniah ia ki kyndon treikam bad yn sa pynbeit noh ia ki”.
U Myntri Rangbah ula pyntip ruh b aula iakynduh ia u Myntri ka Civil Aviation bad ula kyrpad ban pynbun ia ka jingleit jingwan ki liengsuiñ ha Umroi Airport, kata ba ki liengsuin kin mih noh dang step, ha kajuh ka por, katto katne haka por janmiet bad ki liengsuin kiban wan hiar ha ka por mynmiet. Kitei ki jingdonkam kidei kiba la don lypa hapoh ka Umroi airport na ka bynta ban wan hiar ki liengsuin ha ka por miet bad kane kan plie lad ia bun tylli ki liengsuin ban pyniasoh bad ban pynjynsur ia ka por bad na ka liang u Myntri ula kular ban khmih lem halor kane ka bynta.
U Conrad ula iathuh ba u Myntri Sorkar ula pynthikna ruh ban pyniaid sted ia ka jingtyrwa jong ka sorkar jylla ban sdang ia ki Heliport ia ka Shillong bad Tura bad lada ioh iaka jingmynjur bad iaka jingbhah kan iarap shibun ha kabna ioh ia ki jingdonka mkiba kongsan na a bynta ban hiar ki liengsuin bad ban pynieng ia ki Helicopter kiba bun jait.
“Nga la pynsngew ruh halor ka jingdonkam ban pynheh iaka ‘Runway’ ha Baljek Airport bad lada lah ban sdang ia ka jingher ki liengsuin hapdeng ka Shillong bad Tura bad na ka liang u Myntri Sorkar ula pyni iaka jingkyrshan kaba pura halor kitei ki bynta” ula ong.
U Conrad ula iathuh ba ha ka jingiakynduh ia u Myntri Khynnah ka Tnad Rural Development, ula kyrpad ban ban pynbeit ryntih noh ha kaba iadei bad ka rukom siew ia ki jingsiew jong ki projek ki bapher hapoh ka jylla.
“Ka sorkar Meghalaya kala trei bha ha kaba iadei bad ka jingpyndonkam ia ka bhah tyngka ha kaba iadei bad ka rural development ministry bad ka nuksa ka long, ba ha u snem ba la dep, kumba 1,50,000 tylli ki iing PMAY kiba la dep ban tei kiba kot T. 1,500 Klur tam naka pisa kaba la ioh na ka sorkar pdeng” ula ong.
Ula ong ba ka jylla kala treikam bha ruh ha ki projek kiba heh kum ka MNGREA ha kaba kala pyndonkam bha hynrei ka bhah pisa kaba bun ka dang sahkut ha ka ministry khamtam ha kaba iadei bad ka jingthied ia ki tiar ki tar.
U Myntri Rangbah ula iathuh b aula leit ruh ban iakynduh ia u Myntri ka Skill & Entrepreneurship halor ki prokram ki bapher kiba la pyniaid haka jylla bad ia ka jingthrang ban pyniasnoh lang bad ki prokram bapher jong ka sorkar pdeng da ka jingiatreilang bad ula kren ruh halor kiwei kiwei ki mat na ka bynta ban plie lad ia ki samla ka jylla ba kin ioh ia ki jinghikai pyntbit ha ki liang bapher bapher.
